• Sun. Nov 30th, 2025

लक्ष्मीबाई भाऊराव पाटील विद्यालयात कर्मवीर भाऊराव पाटील जयंती साजरी

ByMirror

Sep 22, 2022

लेझीम, झांज व ढोल पथकाच्या निनादात कर्मवीरांना अभिवादन

शिक्षण क्षेत्रात कर्मवीरांनी दिलेल्या योगदानामुळे बहुजन समाज सावरला -अर्जुनराव पोकळे

अहमदनगर (प्रतिनिधी)- कापड बाजार येथील लक्ष्मीबाई भाऊराव पाटील प्राथमिक व माध्यमिक विद्यालयात पद्मभूषण डॉ. कर्मवीर भाऊराव पाटील यांची जयंती उत्साहात साजरी करण्यात आली. लेझीम, झांज व ढोल पथकाच्या निनादात कर्मवीरांना अभिवादन करण्यात आले.


प्रारंभी शाळेत वडाच्या झाडाखाली असलेल्या डॉ. कर्मवीर भाऊराव पाटील यांच्या प्रतिमेस पुष्पहार अर्पण करुन अभिवादन करुन कार्यक्रमाची सुरुवात करण्यात आली. रयत शिक्षण संस्थेचे मॅनेजिंग कौन्सिल सदस्य दादाभाऊ कळमकर यांच्या अध्यक्षतेखाली झालेल्या कार्यक्रमाप्रसंगी जनरल बॉडी सदस्य अर्जुनराव पोकळे, माजी प्राचार्य कैलासराव मोहिते, स्थानिक सल्लागार समितीचे शामराव व्यवहारे, विष्णूपंत म्हस्के, माध्यमिक विद्यालयाचे मुख्याध्यापक एस.एल. ठुबे, प्राथमिक विद्यालयाचे मुख्याध्यापक शिवाजी लंके, पालक प्रतिनिधी ठाणगे, खळेकर आदी उपस्थित होते.


अर्जुनराव पोकळे म्हणाले की, शिक्षण क्षेत्रात कर्मवीरांनी दिलेल्या योगदानामुळे बहुजन समाज सावरला आहे. दूरदृष्टी ठेऊन कर्मवीरांनी बहुजन समाजाला शिक्षण देऊन विकासाच्या प्रवाहात आनले. बदलत्या काळानूसार अद्यावत शिक्षण प्रणाली स्वीकारण्याची गरज असल्याचे त्यांनी सांगितले. दादाभाऊ कळमकर म्हणाले की, कर्मवीरांनी कमवा व शिकाचा दिलेला संदेश युवकांना आजही प्रेरणादायी आहे. रयत शिक्षण संस्थेत बहुजनांची मुले शिक्षण घेऊन आपले भवितव्य घडवीत असल्याचे सांगितले.


प्रास्ताविकात माध्यमिकचे मुख्याध्यापक एस.एल. ठुबे यांनी शाळेच्या अद्यावत शिक्षण प्रणाली व भौतिक सुविधांची माहिती दिली.पाहुण्यांचे स्वागत प्राथमिकचे मुख्याध्यापक शिवाजी लंके यांनी केले. पाहुण्यांच्या हस्ते प्राथमिक व माध्यमिकच्या कला, क्रीडा व शैक्षणिक क्षेत्रातील गुणवंत विद्यार्थ्यांचा सत्कार करण्यात आला. मुला-मुलींसाठी झालेल्या रांगोळी स्पर्धेत रेखाटलेल्या विविध आकर्षक रांगोळी प्रदर्शनाचे उद्घाटन पाहुण्यांच्या हस्ते करुन, या स्पर्धेतील विजेत्यांना बक्षिसे देण्यात आली. या कार्यक्रमात विद्यार्थ्यांनी कर्मवीर भाऊराव पाटील यांच्या जीवनावर प्रकाश टाकणारी भाषणे केली.
कार्यक्रमाचे सूत्रसंचालन प्रदीप पालवे यांनी केले. आभार एम.एन. भद्रे यांनी मानले. कार्यक्रमाचा समारोप रामेश्‍वरी खळेकर या विद्यार्थिनीने गायलेल्या रयत माऊली गीताने झाला. तिला प्रा. कल्याण मुरकुटे यांनी संगीत साथ दिली. कार्यक्रम यशस्वी करण्यासाठी सर्व शालेय शिक्षक व शिक्षकेतर कर्मचार्‍यांनी परिश्रम घेतले.

Leave a Reply

Your email address will not be published. Required fields are marked *