युवकांनी केला संविधानाचा जागर
सामाजिक न्यायाचा मार्ग संविधानानेच दाखविला -अमित काळे
अहिल्यानगर (प्रतिनिधी)- रिपब्लिकन पार्टी ऑफ इंडिया (आठवले) यांच्या वतीने शहरात संविधान दिवस उत्साहात साजरा करण्यात आला. मार्केटयार्ड चौकातील भारतरत्न डॉ. बाबासाहेब आंबेडकर यांच्या पुतळ्यास पुष्पहार अर्पण करून अभिवादन करण्यात आले. उपस्थित युवकांनी “संविधानाचा विजय असो” अशा घोषणा देत भारतीय संविधानाच्या मूल्यांचा जागर केला.
या कार्यक्रमास रिपाईचे युवक जिल्हाध्यक्ष अमित काळे, युवक जिल्हा सचिव गौतम कांबळे, युवक तालुका उपाध्यक्ष अजय पाखरे, युवक तालुका सरचिटणीस निखिल सूर्यवंशी, सुजित घंगाळे, कृष्णा भिंगारदिवे, अमोल गवारे, राहुल सोनकांबळे, रवी सूर्यवंशी, दीपक गायकवाड आदी पदाधिकारी व कार्यकर्ते मोठ्या संख्येने उपस्थित होते.
कार्यक्रमाच्या प्रारंभी डॉ. बाबासाहेब आंबेडकर यांच्या पुतळ्यास पुष्पहार अर्पण करण्यात आले. त्यानंतर युवक कार्यकर्त्यांनी संविधानाचे प्रास्ताविक वाचन करण्यात आले.
अमित काळे म्हणाले की, संविधान दिन हा केवळ एक औपचारिक दिवस नाही, तर भारताच्या लोकशाहीचा, न्यायाचा आणि समानतेचा आधारस्तंभ आहे. डॉ. बाबासाहेब आंबेडकरांनी रचलेले संविधान हे जगातील सर्वश्रेष्ठ संविधान मानले जाते. या संविधानाने सामान्य माणसाला अधिकार, स्वाभिमान आणि सामाजिक न्याय मिळवून दिला आहे. आज आपण सर्वांनी संविधानाच्या मूल्यांचे स्मरण करून त्याचे रक्षण करण्याची प्रतिज्ञा केली पाहिजे. रिपब्लिकन पार्टी ऑफ इंडिया ही सदैव सामाजिक न्याय, स्वाभिमान आणि समानतेच्या तत्त्वांवर काम करत आली आहे. आपल्या हक्कांसाठी लढण्याची ताकद संविधानानेच दिली असल्याचे त्यांनी सांगितले.