निमगाव वाघात रंगणार काव्यांची मैफल, छत्रपती शिवाजी महाराज व संत गाडगे महाराज जयंतीचा उपक्रम
नगर (प्रतिनिधी)- निमगाव वाघा (ता. नगर) येथील आठव्या राज्यस्तरीय काव्य संमेलनाच्या अध्यक्षपदी प्रवचनकार व व्याख्याते प्रा. संपत गर्जे यांची निवड करण्यात आली आहे. हे काव्य संमेलन बुधवार दि. 19 फेब्रुवारी रोजी छत्रपती शिवाजी महाराज व संत गाडगे महाराज यांच्या जयंतीनिमित्त पार पडणार आहे. स्व. पै. किसनराव डोंगरे बहुद्देशीय संस्था, श्री नवनाथ युवा मंडळ आणि धर्मवीर ग्रामीण सार्वजनिक वाचनालय यांच्या वतीने काव्य संमेलनाचे आयोजन करण्यात आले आहे. हे संमेलन गावातील परिवार मंगल कार्यालयात होणार आहे, आणि या काव्य संमेलनात नवोदित कवी व नामवंत कवींचा सहभाग असणार आहे.
डोंगरे संस्थेचे अध्यक्ष तथा काव्य संमेलनाचे संयोजक पै. नाना डोंगरे यांनी प्रा. संपत गर्जे यांची अध्यक्षपदी नियुक्ती करण्याची घोषणा केली आणि त्यांना नियुक्तीपत्र प्रदान केले. प्रा. संपत गर्जे हे पाथर्डी येथील सेवानिवृत्त शिक्षक आहेत. त्यांनी आपल्या साहित्यातून मोठा ठसा उमटवला आहे. त्यांनी 29 वर्षे पिंपरी, संत तुकारामनगर (जि. पुणे) येथील भारतीय जैन संघटना संचलित उच्च माध्यमिक विद्यालयात अध्यापन केले आहे.
प्रा. गर्जे यांना साहित्य क्षेत्रातील महत्त्वपूर्ण योगदानासाठी महाराष्ट्र शासनाचा आदर्श राज्यस्तरीय शिक्षक पुरस्कार मिळाला आहे. त्यांच्या काव्यसंग्रहात शब्द आशयाचे घन, कविता : समाज आणि संस्कृती, अभंगाची मूल्यगंगा समिक्षापर ग्रंथ, सारांशलेखन एक कला यांसारख्या अत्यंत प्रभावी व प्रेरणादायी साहित्यिक कार्याचा समावेश आहे. त्यांची साहित्यिक कर्तृत्वाची दखल घेत अनेक राज्यस्तरीय व राष्ट्रीय पुरस्कारांद्वारे त्यांना गौरवण्यात आले आहे.
प्रा. संपत गर्जे यांना काव्य संमेलनाच्या अध्यक्षपदी निवडले जाणे हे त्यांच्या साहित्य क्षेत्रातील कार्याची दखल घेणारे आहे. काव्य संमेलनाच्या निवड समितीने एकमताने त्यांना अध्यक्षपदासाठी मंजुरी दिली आणि याबद्दल त्यांचे सर्वत्र अभिनंदन होत आहे.
काव्य संमेलनात विविध कवींचा सहभाग असणार आहे, ज्यामध्ये समाजाच्या विविध अंगांवर प्रकाश टाकणारी कविता सादर केली जाईल. प्रा. गर्जे यांचे अध्यक्ष म्हणून मार्गदर्शन संमेलनाला एक वेगळी दिशा देईल, असा विश्वास आयोजकांनी व्यक्त केला आहे.