निमगाव वाघात रंगला कुस्त्यांचा थरार; मल्लांची जिल्हा चाचणीसाठी निवड
अहमदनगर (प्रतिनिधी)- निमगाव वाघा (ता. नगर) येथे वरिष्ठ राज्यस्तरीय गादी व माती अजिंक्यपद कुस्ती स्पर्धा (अधिवेशन) व महाराष्ट्र केसरी किताब लढत 2023 स्पर्धेसाठी नगर तालुका तालीम सेवा संघाच्या वतीने तालुकास्तरीय कुस्ती निवड चाचणी उत्साहात पार पडली. यावेळी मल्लांचे रंगतादार कुस्त्यांचे सामने रंगले होते. कुस्त्यांचा थरार पाहण्यासाठी पंचक्रोशीतील ग्रामस्थांनी गर्दी केली होती.

गावातील बिरोबा मंदिर येथे कुस्ती आखाड्यात पैलवान हर्षवर्धन कोतकर यांच्या हस्ते कुस्ती लावून निवड चाचणी स्पर्धेचा शुभारंभ करण्यात आला. यावेळी नगर तालुका तालिम सेवा संघाचे अध्यक्ष तथा ग्रामपंचायत सदस्य पै.नाना डोंगरे, सचिव पै. बाळू भापकर, माजी सरपंच साहेबराव बोडखे, दूध डेअरीचे चेअरमन अण्णा जाधव, नवनाथ विद्यालयाचे मुख्याध्यापक उत्तम कांडेकर, पोपट शिंदे, दशरथ गव्हाणे, पै. अजय अजबे, नगर तालुका कुस्तीगीर संघाचे सचिव पै. संदिप डोंगरे, निळकंठ वाघमारे, चंद्रकांत पवार, कोंडीभाऊ फलके, नामदेव भुसारे, पै. सोमनाथ राऊत, पै. कादरभाई शेख, अतुल फलके, संजय पुंड, विकास निकम, गणेश फलके, भानुदास ठोकळ, बबन शेळके, गुलाब केदार आदींसह ग्रामस्थ उपस्थित होते.
महाराष्ट्र केसरी कुस्ती स्पर्धेसाठी जिल्हा निवड चाचणी 22 ऑक्टोबर रोजी केडगाव येथे होणार आहे. या पार्श्वभूमीवर नगर तालुक्याची निवड चाचणी पार पडली. मल्लांची निवड चाचणी निमगाव वाघा येथील आखाड्यात रंगतदार कुस्त्यांच्या सामन्यांनी रंगली होती.

पै. नाना डोंगरे म्हणाले की, दिग्गज मल्लांचा वारसा नगर जिल्ह्याला लाभला असून, अनेक नवीन मल्ल कुस्ती क्षेत्रात पुढे येत आहे. ग्रामीण भागातील मल्ल मातीत चांगली कुस्ती करतात. मात्र कुस्तीमध्ये पुढे जाण्यासाठी मॅटवर देखील नवीन मल्लांनी लक्ष केंद्रीत करण्याची गरज आहे. यासाठी मल्लांना योग्य मार्गदर्शन करुन प्रोत्साहन देण्याचे कार्य सुरु असल्याचे त्यांनी सांगितले. पैलवान हर्षवर्धन कोतकर यांनी विजयी मल्लास पुढील स्पर्धेसाठी शुभेच्छा दिल्या. या कार्यक्रमात पै. नाना डोंगरे यांना जळगाव जिल्ह्यातील आदिलशाह फारुकी बहुउद्देशीय संस्थेच्या वतीने माजी राष्ट्रपती डॉ. जाकीर हुसैन राज्यस्तरीय महाराष्ट्र गौरव पुरस्कार जाहीर झाल्याबद्दल एकता फाऊंडेशन व प्रहार दिव्यांग संघटनेच्या वतीने त्यांचा सत्कार करण्यात आला.
राज्यस्तरीय वरिष्ठ गादी व माती अजिंक्यपद कुस्ती स्पर्धेसाठी 57, 61, 65, 70, 74, 79, 86, 92, 97 व महाराष्ट्र केसरी 86 ते 125 किलो वजन गटसाठी निवड चाचणी स्पर्धा पार पडली. स्पर्धेसाठी 135 मल्लांचा सहभाग लाभला. यामधील विजयी मल्ल गादी विभागसाठी महेश शेळके (निमगाव वाघा), अरबाज शेख (बुऱ्हाणनगर), सौरभ शिंदे (पिंपळगाव वाघा), श्यामराव गव्हाणे (अंबिलवाडी), लौकिक चौगुले (नेप्ती), महाराष्ट्र केसरीसाठी पै. युवराज कर्डिले (बुऱ्हाणनगर).
तर माती विभागसाठी ओम वाघ (बुऱ्हाणनगर), अभिषेक धाडगे (बुऱ्हाणनगर), प्रकाश कार्ले (चास), सौरभ मराठे (बुऱ्हाणनगर), अनिकेत कर्डिले (बुऱ्हाणनगर), विजय जाधव (बुऱ्हाणनगर), सुजित कांडेकर (हिंगणगाव), मोहित म्हस्के (उक्कडगाव), महाराष्ट्र केसरी माती विभागसाठी मनोहर कर्डिले (बुऱ्हाणनगर) या मल्लांची जिल्हास्तरीय निवड चाचणीसाठी निवड झाली आहे.
