प्रेयर वॉरियर्स व नयनदर्पण फाऊंडेशनचा ख्रिसमस फेस्टिवलचा उपक्रम
बायबलचे प्रवचन व भक्तीगीतामध्ये भाविक रममाण
अहमदनगर (प्रतिनिधी)- शहरातील तारकपूर (शांतीपूर) मध्ये अंध, कुष्ठरोगी व वंचित घटकाच्या समुदायाबरोबर ख्रिसमस फेस्टिवल साजरा करुन, त्यांना थंडीनिमित्त ब्लँकेट व ख्रिसमससाठी नवीन कपड्यांचे वाटप करण्यात आले. प्रेयर वॉरियर्स (24 तास) तारकपूर व नयनदर्पण फाऊंडेशन भिंगार यांच्या संयुक्त विद्यमाने हा कार्यक्रम घेण्यात आला.
बायबलचे प्रवचन व भक्तीगीतामध्ये उपस्थित भाविक रममाण झाले होते. या कार्यक्रमासाठी प्रमुख पाहुणे म्हणून रेव्हरंट अ‍ॅण्ड पास्टर असोसिएशन अहमदनगरचे अध्यक्ष बिशप सॅम्युअल भिंगारदिवे, सर्व कमिटी सदस्य, प्रेअर वॉरियर्सचे संस्थापक अध्यक्ष पास्टर जोसेफ वैरागर, नयनदर्पण फाऊंडेशनचे अध्यक्ष राजेंद्र पंडित, रेव्ह. जे.आर. वाघमारे, रेव्ह. अशोक पठारे, रेव्ह. सतीश तोरणे, रेव्ह. आनंद घोरपडे, रेव्ह. सॅम्युअल नाईक, माजी प्राचार्या शारदाबाई लोंढे, सामाजिक कार्यकर्त्या रजनी शेट्टी, माजी प्राचार्या शैलाताई कांबळे, सिस्टर अलका पवार, राहुल वडागळे, विशाल शेलार, ब्रदर बाळासाहेब वडागळे, राम वडागळे, रावसाहेब अवचित, सुधाकर वडागळे, विशाल वडागळे, अमोल साठे, प्रियश वाघमारे, श्याम वैरागर, राजू शेलार, लुकस वाघमारे, प्रा. अंबादास उमाप, संदीप पवार आदी प्रमुख पाहुणे म्हणून उपस्थित होते.
प्रास्ताविकात पास्टर जोसेफ वैरागर म्हणाले की, मागील दहा वर्षापासून समाजकार्य सुरू आहे. कोरोनाच्या काळात प्रेयर वॉरियर्स ग्रुपची स्थापना करुन गोरगरीब गरजूंना आधार देण्यात आला. कोरोना काळात रुग्णांना जेवणाचे डबे, गरजूंना अन्नधान्य वाटप करण्यात आले. कोरोना संपल्यानंतर हे कार्य अविरत पुढे सुरू ठेवून, विविध सामाजिक उपक्रम राबविण्यात येत आहे. त्याचाच एक भाग म्हणून हा उपक्रम राबविण्यात आल्याचे त्यांनी सांगितले.
बिशप सॅम्युअल भिंगारदिवे म्हणाले की, मानव सेवा हाच खरा धर्म आहे. भगवान येशु ख्रिस्तांनी वंचित, दीन-दुबळ्यांच्या कल्याणासाठी आपले जीवन खर्च केले. माणुसकीचा मार्ग दाखविला. आज त्यांच्या मार्गावर चालण्याची गरज आहे. स्वार्थापोटी अनेक जगतात, ते जीवन नसून इतरांसाठी जगण्याला खरे महत्त्व असल्याचे त्यांनी सांगितले. सामाजिक काम करणार्‍या या सामाजिक संस्थांना प्रोत्साहन देऊन हातभार लावण्याचे त्यांनी आवाहन केले.
राजेंद्र पंडित यांनी आपल्या कमाईचा एक छोटासा भाग गरजूंसाठी खर्च करण्याची आवश्यकता आहे. माणुसकीच्या भावनेने प्रत्येकाने योगदान देऊन दीन-दुबळ्यांच्या प्रश्‍न सोडविण्यासाठी पुढे येण्याचे आवाहन केले. रजनी शेट्टी यांनी वंचितांचे नेतृत्व करणार्‍या सामाजिक संस्थांमुळे समाज सावरला आहे. या सेवाभावी कार्याला नेहमीच सहकार्य करण्याचे त्यांनी आश्‍वासन दिले.
उपस्थित पाहुण्यांच्या हस्ते अंध, कुष्ठरोगी व गरजू घटकातील तीनशेपेक्षा जास्त व्यक्तींना ब्लँकेट व कपड्यांचे वाटप करण्यात आले. तर महिलांना साड्यांची भेट देण्यात आली. या कार्यक्रमासाठी परिसरातील नागरिक, शहरात सामाजिक कार्य करणारे विविध सामाजिक संघटनेचे पदाधिकारी व सदस्य मोठ्या संख्येने हजर होते. या कार्यक्रमास भाऊसाहेब उनवणे, तारकपूर रिक्षा स्टॉप (इन गेट) यांचे विशेष सहकार्य लाभले. सामुदायिक प्रार्थना व स्नेहभोजनाने कार्यक्रमाची सांगता झाली.
