अध्यक्षपदी सुरेश बोरुडे यांची नियुक्ती
चर्मकार समाजाच्या सर्वांगीन विकासासाठी शेवटच्या घटकापर्यंत संघटन होणे गरजेचे -संजय खामकर
अहमदनगर (प्रतिनिधी)- चर्मकार समाजाच्या सर्वांगीन विकासासाठी शेवटच्या घटकापर्यंत संघटन होणे गरजेचे आहे. गटई आघाडीच्या माध्यमातून प्रत्येक चर्मकार समाज बांधव संघटनेला जोडला जाऊन त्यांचे प्रश्‍न सोडविण्यात येणार आहे. संघटना समाजाच्या विकास, न्यायहक्क आणि सन्मानासाठी कार्य करत असल्याचे प्रतिपादन चर्मकार विकास संघाचे प्रदेशाध्यक्ष संजय खामकर यांनी केले.
संत रविदास भवन (ता. श्रीरामपूर) येथे चर्मकार विकास संघाचे प्रदेशाध्यक्ष संजय खामकर यांच्या अध्यक्षतेखाली बैठक पार पडली. यावेळी प्रदेशाध्यक्ष खामकर बोलत होते. या बैठकित चर्मकार विकास संघाची श्रीरामपूर तालुक्यासाठी गटई आघाडी स्थापन करुन त्याची कार्यकारणी जाहीर करण्यात आली. यावेळी प्रदेश समन्वयक रामदास सोनवणे, वधु-वर समितीचे खजिनदार अरुण गाडेकर, रविदासीया चेंबरचे संदीप सोनवणे प्रमुख पाहुणे म्हणून उपस्थित होते.
पुढे प्रदेशाध्यक्ष खामकर म्हणाले की, गटई कामगारांना शासनाच्या सर्व योजनांचा लाभ मिळवून देण्यासाठी संघटना प्रयत्नशील आहे. आर्थिक दुर्बल घटक असलेल्या गटई बांधवांसाठी अपघात विमा, आरोग्य विमा, घरकुल व पेन्शन योजना लागू करण्यासाठी शासनस्तरावर पाठपुरावा सुरु असल्याचे त्यांनी सांगितले.
रामदास सोनवणे यांनी गटई बांधवांसाठी असलेल्या शासन योजनांची सविस्तर माहिती दिली. खामकर यांच्या हस्ते नुतन पदाधिकार्‍यांना नियुक्तीपत्र देण्यात आले. या बैठकिचे नियोजन चर्मकार विकास संघाचे श्रारामपूर तालुकाध्यक्ष चांगदेव देवराय, उपाध्यक्ष रविंद्र गाडेकर, सामाजिक कार्यकर्ते दादासाहेब कांबळे, संतोष देवराय, सतिष खामकर, सर्जेराव देवरे, सुरेश भोसले, कर्णासाहेब कापसे यांनी केले होते.
श्रीरामपूर चर्मकार विकास संघाच्या गटई आघाडीची नुतन कार्यकारणी पुढील प्रमाणे:- अध्यक्ष- सुरेश बोरुडे, उपाध्यक्ष- ज्ञानेश्‍वर जाधव, सचिव-विशाल रहिले, कार्याध्यक्ष-ओंकार अनुष्ठान, उप-कार्याध्यक्ष-अशोक अहिरे, खजिनदार- सुनिल सोनवणे, सह खजिनदार- विठ्ठल कापसे, शहर संघटक- बन्सी रहिले, संघटक- भारत ठाकरे, कार्यकारणी सदस्य- रतन रहिले, भाकचंद्र अनुष्ठान, रमेश सुरंजे, दशरथ रहिले, परशराम लोंढे, नामदेव अनुष्ठान. या नूतन पदाधिकार्‍यांचे सर्वत्र अभिनंदन होत आहे.
