सावेडीच्या जॉगिंग ट्रॅकवर योग सोहळा उत्साहात
युवतींसह महिलांचा उत्स्फूर्त सहभाग
अहमदनगर (प्रतिनिधी)- जागतिक योग दिनाचे औचित्य साधून रविवारी (18 जून) सावेडी उपनगरातील जॉगिंग ट्रॅक येथे योग सोहळा दिमाखात पार पडला. कर्मयोगी योगा स्टुडिओ व अहमदनगर महानगरपालिका यांच्या संयुक्त विद्यमाने झालेल्या या सोहळ्यात महिला-पुरुषांसह तरुणाईने मोठ्या संख्येने सहभागी होऊन योगाचे धडे गिरवले.
अल्हाददायक पहाट…, अंगावर पडणारे कोवळे सूर्यकिरण, सोवतीला गार वारा व आकाशाच्या उगवतीच्या रंगाची झालेली उधळण आणि योगाच्या विविध आसनांनी रविवारची आरोग्यमय पहाट नगरकरांनी अनुभवली. पहाटे 6 वाजता महापौर रोहिणीताई शेंडगे यांच्या हस्ते योग सोहळ्याचे दीपप्रज्वलनाने शुभारंभ झाला. यावेळी स्थायी समितीचे सभापती गणेश कवडे, भाजपचे जिल्हाध्यक्ष महेंद्र गंधे, योगा थेरपिस्ट गायत्री गारडे, उद्योजक सुहास फुंदे, जावेद शेख, गणेश दहिवाले, डॉ. इमरान शेख, क्रीडा भारतीचे अध्यक्ष तथा शिव छत्रपती पुरस्कार विजेते निर्मल थोरात, बाळकृष्ण गारडे, महापालिकेचे क्रीडा अधिकारी फिलिप्स, प्रियंका चिखले, मोहसीन सय्यद, सौरभ गारडे, अशोक झोटिंग, गुलाटी, ऐश्‍वर्या गारदे आदी उपस्थित होते.
प्रारंभी नृत्य झंकारच्या मुलींनी बहारदार गणेश वंदना सादर केली. राष्ट्रपती शिक्षक पुरस्कार प्राप्त डॉ. अमोल बागुल यांच्या बासरी वादनाने योग सोहळ्याचे वातावरण प्रफुल्लित व प्रसन्न झाले होते. महापौर रोहिणीताई शेंडगे यांनी निरोगी आरोग्यासाठी योग चळवळ बहरत आहे. योगाचा झपाट्याने प्रचार-प्रसार होत असून, मुलींसह महिला देखील आरोग्यासाठी जागरुक झाल्या आहेत. योगा थेरपिस्ट गायत्री गारडे यांनी निरोगी आरोग्यासाठी चालवलेल्या योग चळवळीला महिल व युवतींचा उत्स्फूर्त प्रतिसाद मिळत असून, ही योग चळवळ निरोगी आरोग्याची पायाभरणी असल्याचे त्यांनी सांगितले.
योगा थेरपिस्ट गायत्री गारडे यांनी ओम ने योगाची सुरुवात केली. यामध्ये सुर्यनमस्कार, वीरभद्रासन, उत्कटासन, उत्तरासन, सेतुबंधासन, नटराजासन, त्रिकोनासन आदी आसने प्रात्यक्षिकांसह योग साधकांकडून करुन घेतले. अवघड असलेले विविध आसने त्यांनी सोप्या पध्दतीने करण्याचे प्रात्यक्षिक दाखवून त्याचे महत्त्व व निरोगी शरीरासाठी असलेले फायदे विशद केले. गारडे हिने निरोगी आरोग्यासाठी एक दिवसापुरता योग न करता आपल्या दैनंदिन जीवनाचा अविभाज्य अंग बनविण्याचे आवाहन केले. तर कुटुंबाचा भार सांभाळणार्‍या महिलांना अरोग्याप्रति अधिक जागरुक राहण्याचे त्यांनी सांगितले.
स्पर्धेच्या व धावपळीच्या युगात प्रत्येक व्यक्ती व्यायामापासून दुरावत असून, ताण-तणावाखाली वावरत आहे. चुकीची आहार पध्दती, व्यायामाचा अभाव व तणावपूर्ण जीवनामुळे बहुतेकांचे मानसिक व शारीरिक स्वास्थ्य धोक्यात आले आहे. जीवन निरोगी व शरीर सदृढ राहण्यासाठी नागरिकांमध्ये योग-प्राणायामाची आवड निर्माण होण्याच्या उद्देशाने या सोहळ्याचे आयोजन करण्यात आले होते.
दिमाखदार योग सोहळ्याची नियोजनबध्दपणे तयारी करण्यात आली होती. आलेल्या साधकांना शिकवण्यासाठी महिला व पुरुष योग प्रशिक्षकांची टिम उपस्थिती होती. योग साधकांना मॅट पासून ते टी शर्ट उपलब्ध करुन देण्यात आले होते. कार्यक्रमाचा समारोप मल्लखांबच्या चित्तथरारक प्रात्यक्षिकांनी झाला. खेळाडूंनी मल्लखांबाच्या विविध कवायती सादर केल्या. कार्यक्रमाचे सूत्रसंचालन प्रियंका पाटील शेळके यांनी केले.