म्हस्के हॉस्पिटल व आमदार संग्रामभैय्या जगताप जनसंपर्क कार्यालयाचा उपक्रम
खर्चिक आरोग्य सुविधांमुळे मोफत आरोग्य शिबिर मोठे आधार ठरत आहे -आ. संग्राम जगताप
अहमदनगर (प्रतिनिधी)- खर्चिक आरोग्य सुविधांमुळे मोफत आरोग्य शिबिर मोठे आधार ठरत आहे. सामाजिक बांधिलकीतून मोफत आरोग्य शिबिरचा उपक्रम कौतुकास्पद आहे. शरीराने धडधाकट असलेला व्यक्तीचे आरोग्य आतूनही चांगले असेल हा गैरसमज आहे. विविध गंभीर आजार टाळण्यासाठी शिबिराच्या माध्यमातून वेळोवेळी तपासण्या आवश्यक असल्याचे प्रतिपादन आमदार संग्राम जगताप यांनी केले.
भिंगार येथील म्हस्के हॉस्पिटल व आमदार संग्रामभैय्या जगताप जनसंपर्क कार्यालयाच्या वतीने आयोजित करण्यात आलेल्या मोफत रोग निदान शिबिराच्या उद्घाटनाप्रसंगी आमदार जगताप बोलत होते. यावेळी राष्ट्रवादी काँग्रेसचे शहर जिल्हाध्यक्ष प्रा. माणिकराव विधाते, हृदयरोगतज्ञ डॉ. अमित भराडिया, भिंगार राष्ट्रवादीचे शहराध्यक्ष संजय सपकाळ, विशाल बेलपवार, सागर बोरुडे, अभिजीत सपकाळ, गणेश बोरुडे, मारुती पवार, अ‍ॅड. अनिल लांडगे आदींसह म्हस्के हॉस्पिटलचे कर्मचारी व नागरिक मोठ्या संख्येने उपस्थित होते.
पुढे बोलताना आमदार जगताप म्हणाले की, शहराचे मोठे उपनगर असलेला भिंगार शहराला अनेक गावे जोडलेली आहे. आपत्कालीन परिस्थितीत चांगले अद्यावत रुग्णालय जवळ असणे आवश्यक आहे. यासाठी म्हस्के हॉस्पिटलची पायाभरणी झाली असून, या भागातील नागरिकांना अद्यावत आरोग्य सुविधा मिळत आहे. औषध फवारणीचे अन्न व फास्टफुडच्या जमान्यात आरोग्यावर दुष्परिणाम होत आहे. यासाठी आरोग्याप्रति जागरूक राहण्याचे त्यांनी आवाहन केले.
आमदार संग्राम जगताप व जिल्हा बँकेचे चेअरमन शिवाजी कर्डिले यांच्या मार्गदर्शनाखाली झालेल्या या शिबिरास परिसरातील नागरिकांचा उत्स्फूर्त प्रतिसाद लाभला. म्हस्के हॉस्पिटलच्या तज्ञ डॉक्टरांनी रुग्णांची मोफत तपासणी केली. यावेळी विविध खर्चिक तपासण्या अल्पदरात उपलब्ध करुन देण्यात आल्या होत्या. याचा देखील रुग्णांनी लाभ घेतला.
अपघातातील रुग्णांसाठी मुख्यमंत्री सहाय्यता निधी अंतर्गत सर्व शस्त्रक्रिया व उपचार मोफत केले जात असल्याची माहिती डॉ. किशोर म्हस्के यांनी दिली. या शिबिरामध्ये डॉ. अमित देशपांडे, डॉ. सुलभा पवार, डॉ. विनोद श्रीखंडे, डॉ. सुशांत घुमरे, डॉ. कौशल्या म्हस्के आदी तज्ञ डॉक्टर उपस्थित होते. शिबिर यशस्वी होण्यासाठी आमदार संग्राम भैय्या जगताप यांचे वैद्यकीय सहाय्यक अक्षय पाटील यांनी परिश्रम घेतले.