सैनिक समाज पार्टीची मागणी
15 ऑक्टोबरला मिरी येथे रास्ता रोको करण्याचे जाहीर
अहमदनगर (प्रतिनिधी)- मिरी पंचक्रोशीतील पाण्याचा वनवास कायमचा संपविण्यासाठी घोडेगाव मार्गे खतवाडी जुनी चारी कार्यान्वीत करण्याची मागणी सैनिक समाज पार्टीचे जिल्हाध्यक्ष रावसाहेब काळे यांनी केली आहे. या मागणीचे निवेदन जिल्हाधिकारी यांना देऊन मुख्यमंत्र्यांना पाठविण्यात आली आहे. या मागणीसाठी स्थानिक ग्रामस्थांसह सैनिक समाज पार्टीने 15 ऑक्टोबरला मिरी येथे रास्ता रोको करण्याचा इशारा देण्यात आला आहे.
पाथर्डी तालुक्यातील ग्रामीण भागात अनेक वर्षापासून खतवाडीच्या जुनी चारीचा प्रश्‍न गाजतोय. हा जिव्हाळ्याचा प्रश्‍न सुटत नसल्याने शेतकर्‍यांना पाण्यासाठी जीवन जगणे कठीण झाले आहे. पाथर्डी तालुका दुष्काळी भाग म्हणून ओळखला जातो. या ठिकाणी शेतीसाठी पावसाच्या पाण्यावर अवलंबून रहावे लागते. या परिसरातील नागरिकांचे हाल अपेष्टा संपलेल्या नसून, शासन-प्रशासनाचे या ज्वलंत विषयाकडे दुर्लक्ष होत आहे. जिल्ह्यातील धरणाजवळ 60 कि.मी. असणारे गाव विकासाचा अभाव व राजकारणामुळे पाण्याचा वनवास भोगावा लागत आहे. 600 कि.मी. पर्यंत असलेल्या गावांना धरणाचा लाभ होऊन ती गावे सुजलाम-सुफलाम बनली आहे. मात्र धरणा जवळच्या गावांचा पिण्याच्या पाण्याचा प्रश्‍न देखील सुटलेला नसल्याचे निवेदनात म्हंटले आहे.
हा प्रश्‍न सोडविण्यासाठी सरकारने बंदिस्त पाईपलाईन दिली, ती मात्र असून नसल्या सारखी नावापुरतीच राहिली आहे. ही जलवाहिनी ना दुरुस्त असून, खर्चाचे आकडे मोठ-मोठे झालेले आहे. शेतकर्‍यांना याचा उपयोग नसून, जुनी चारी आणण्यासाठी सैनिक समाज पार्टीने जन आंदोलन सुरु केले असल्याचे स्पष्ट करण्यात आले आहे. तर घोडेगाव खतवाडी मार्गे जुनी चारी प्रकल्प लवकरात लवकर मंजूर करून शेतकर्‍यांना न्याय देण्याची मागणी करण्यात आली आहे.
