क्रीडा शिक्षकांचे असहकार आंदोलन स्थगित
21 तारखेपासून तालुका स्पर्धांना होणार प्रारंभ
अहमदनगर (प्रतिनिधी)- शालेय स्पर्धा आयोजनाचे मागील वर्षाची रक्कम, तालुका प्राविण्य प्रमाणपत्रे न मिळणे, अग्रिम देण्यास नकार यामुळे शालेय क्रीडा स्पर्धेवर शारीरिक शिक्षकांनी टाकलेला असहकार स्थगित करून शालेय क्रीडा स्पर्धेच्या ऑनलाईन प्रवेशिका भरण्यास सुरु करण्यात येणार असून, क्रीडा कार्यालयाकडून लेखी मंजुरी मिळाल्यानंतर 21 ताखेपासून शालेय क्रीडा स्पर्धा सुरु करण्याबाबत समन्वय समितीने निर्णय घेतला आहे.
जिल्हा क्रीडा परिषदेची जिल्हाधिकारी यांचे दालनात झालेल्या बैठकीत आंदोलकांच्या मागण्या मान्य करताना शासन निर्णयाधिन राहून जिल्हाधिकारी सिद्धराम सालीमठ यांनी मंजुरी दिली. या वेळी क्रीडा विकास परिषदेचे सदस्य शिवछत्रपती पुरस्कारार्थी प्रा. सुनिल जाधव, शारीरिक शिक्षक संघटनेचे निमंत्रित नगर तालुकाध्यक्ष महेंद्र हिंगे, राज्याध्यक्ष राजेंद्र कोतकर यांनी समर्थपणे बाजू मांडली तसेच मागण्या मान्य केल्याने जिल्हाधिकारी सालीमठ यांचे आभार मानले.
बैठकीत पुढील मागण्या मान्य करण्यात आल्या. मागील वर्षीचे स्पर्धा आयोजन खर्चाचे अनुदान त्वरीत देणार, शालेय क्रीडा स्पर्धा पंच मानधन दुप्पट करण्यात येऊन तालुकास्तर 300, जिल्हास्तर 400, राज्यस्तर 500 रुपये प्रतिदिन करण्यात आले, मागील वर्षीचे तालुका प्राविण्य प्रमाणपत्र प्रिटेंड स्वरूपात देणार, तालुका प्रवेशिका भरून झाल्यानंतर लगेच स्पर्धा आयोजनासाठी अग्रिम रक्कम देणार, क्रीडा संकुलातील व स्पर्धेकरीता लागणाऱ्या सुविधा व साहित्य पुरविण्याचे आदेश जिल्हा क्रीडाधिकारी यांनी दिले. यावेळी थकित अनुदान, मैदाने व सुविधेतील त्रुटी या बाबत जिल्हाधिकारी यांनी कान उघडणी केली. तसेच क्रीडा संकुलात सिंथेटिक मैदाने, ट्रॅक, टर्फ विकेट व्हावी म्हणून संकुले करण्याबाबत मंत्री महोदयांशी चर्चा करून निर्णय घेऊ असे जिल्हाधिकारी यांनी सांगितले.
शालेय प्रवेशिका भरताना आकारण्यात येणारी सुविधा फी रद्द करण्याबाबत संबंधित एजन्सीला पत्र देण्याबाबत सूचना दिल्या. मात्र ही फी रद्द न झाल्यास ती भरणार नाही याबाबत आंदोलकांचे प्रतिनिधी ठाम होते. जिल्हा क्रीडा परिषदेच्या या बैठकीस जिल्हाधिकारी सिद्धराम सालीमठ, जिल्हा क्रीडा अधिकारी भाग्यश्री बिले, शिक्षणाधिकारी अशोक कडूस, प्रा. सुनिल जाधव, राजेंद्र कोतकर, महेंद्र हिंगे, उपशिक्षणाधिकारी बुगे, कार्यालयाचे ज्ञानेश्वर खुरांगे, विशाल गर्जे आदी उपस्थित होते.
असहकार आंदोलनात शिक्षक नेते आप्पासाहेब शिंदे, शिक्षक सोसायटी चेअरमन दिलीप काटे, तुवर पाटील, बापुराव होळकर, प्रकाश मोढे, उन्मेश शिंदे, सुहास भोसले, नितीन निकम, प्रशांत होन, सुनिल आहेर, राजेंद्र शिरसाठ, पोपट काळे, नारायण पाटील, हिम्मतराव खडके, योगेश उगले, प्रल्हाद साळुंके, बापूराव गायकवाड, निवृत्ती घुले, जिल्हा अध्यक्ष सुनिल गागरे, सचिव शिरीष टेकाडे, घनश्याम सानप, अजित वडवकर, शंकरराव बारस्कर यांचे योगदान लाभले.
राज्यभरातून आंदोलनास पाठिंबा
आंदोलनास राज्य शारीरिक शिक्षक संघटना अमरावती, महाराष्ट्र राज्य शारीरिक शिक्षण समन्वय समिती, महाराष्ट्र राज्य शिक्षक भारती संघटना, माध्यमिक शिक्षक संघ तसेच विविध खेळ संघटनांनी सक्रीय पाठींबा दिला होता.