आमदार जगताप यांच्या निधीतून शाळेच्या वॉल कंपाऊंडच्या कामाचे भूमिपूजन
नागरिकांचे प्रश्‍न प्राधान्याने सोडवण्याचे काम सुरू -लताताई शेळके
अहमदनगर (प्रतिनिधी)- केडगाव इंदिरानगर येथील जिल्हा परिषदेच्या प्राथमिक शाळेला नवीन वर्षाची वॉल कंपाऊंडची भेट मिळणार आहे. आमदार संग्राम जगताप यांच्या विकास निधीतून मनपा महिला व बाल कल्याण समितीच्या माजी सभापती तथा प्रभागाच्या नगरसेविका लताताई शेळके यांच्या पाठपुराव्याने शाळेचे वॉल कंपाऊंडचे काम हाती घेण्यात आले आहे.
या कामाचे भूमिपूजन गुरुवारी (दि.29 डिसेंबर) ज्येष्ठ नेते बलभिम आप्पा शेळके यांच्या हस्ते झाले. नगरसेविका लताताई शेळके यांच्या अध्यक्षतेखाली झालेल्या कार्यक्रमाप्रसंगी साखर कामगार संघटनेचे कॉ. आनंद वायकर, नगरसेविका गौरी गणेश नन्नवरे, सुरज शेळके, गोरख जाधव, भास्कर कराळे, नामदेव चव्हाण, आबा धाडगे, हसन तांबोली, दिलीप निकाळजे, मुख्याध्यापक आप्पा जाधव, अंगणवाडी सेविका रंजना मांढरे, अनुजा रिंगणे, नलिनी पाटोळे, बलभिम बचाटे आदींसह परिसरातील नागरिक व शालेय विद्यार्थी मोठ्या संख्येने उपस्थित होते.
कॉ. आनंद वायकर म्हणाले की, शहरापासून जवळ असलेल्या हा भाग पूर्वी दुर्लक्षित राहिला होता. मात्र स्थानिक नगरसेवकांनी सातत्याने केलेल्या पाठपुराव्याने प्रभागाचे रूप पालटले आहे. शहराप्रमाणे या इंदिरानगर, विद्यानगर व हनुमान नगरला सोयी-सुविधा निर्माण झाल्या आहेत. मागील पाच वर्षात या परिसराचा मोठा विकास होवून प्रभागाचा कायापालट झाला. रस्ते, ड्रेनेजलाईन व लाईटची चांगली सुविधा निर्माण झाली आहे. नागरिकांचे प्रश्‍न सोडविणारे नगरसेवक असल्यास त्या परिसराचा विकास साधला जात असल्याचे त्यांनी सांगितले.
बलभिम आप्पा शेळके म्हणाले की, अनेक अडचणीतून वाट काढत परिसरातील विकास कामे मार्गी लावण्यात आली. विकास कामे करताना अनेक अडचणी आल्या, मात्र विकास हेच ध्येय ठेवून काम केले असल्याचे त्यांनी स्पष्ट केले. तर झालेल्या विकास कामातूनच या परिसरात लोकवस्ती मोठ्या झपाट्याने वाढली असल्याचे सांगितले.
नगरसेविका लताताई शेळके यांनी प्रभागाकडे विशेष लक्ष असून, नागरिकांचे प्रश्‍न प्राधान्याने सोडवण्याचे काम सुरू असल्याचे सांगितले. गणेश नन्नवरे यांनी प्रभागातील मूलभूत प्रश्‍न सोडविण्याकडे विशेष प्राधान्य असल्याचे स्पष्ट केले.
सुरज शेळके म्हणाले की, इंदिरानगर भागातील जिल्हा परिषद शाळेत परिसरातील सर्वसामान्यांची मुले शिकत आहे. वॉल कंपाऊंड नसल्याने मुलांची सुरक्षितता व इतर प्रश्‍न निर्माण होत होते. यासंबंधी आमदार जगताप यांच्याकडे पाठपुरावा केला असता त्यांनी विद्यार्थ्यांसाठी तातडीने निधी उपलब्ध करुन दिल्याचे त्यांनी आभार मानले. कार्यक्रमाचे सूत्रसंचालन भास्कर कराळे यांनी केले. शाळेच्या वतीने मुख्याध्यापक आप्पा जाधव यांनी आभार मानले.
