अन्याय निवारण निर्मूलन सेवा समितीचा उपोषणाचा इशारा
शेडमध्ये मोठ्या प्रमाणात अवैधरित्या मुरुम टाकल्याचा आरोप
नगर (प्रतिनिधी)- भाळवणी (ता. पारनेर) येथील गट नंबर 37 पी मधील एच.पी. पेट्रोल पंपा समोरील शेडमध्ये मोठ्या प्रमाणात अवैधरित्या मुरुम टाकल्याने रॉयल्टीची चौकशी होऊन महाराष्ट्र जमीन महसूल कायदा कलम 48 (7), 48 (8) नुसार दंडात्मक कारवाई करण्याची मागणी अन्याय निवारण निर्मूलन सेवा समितीच्या वतीने जिल्हाधिकारी यांच्याकडे निवेदनाद्वारे करण्यात आली आहे. याप्रकरणी पंधरा दिवसात कारवाई न झाल्यास जिल्हाधिकारी कार्यालयासमोर उपोषण करण्याचा इशारा समितीचे जिल्हाध्यक्ष अरुण रोडे यांनी दिला आहे.
भाळवणी (ता. पारनेर) येथील गट नंबर 37 पी मधील एच.पी. पेट्रोल पंपा समोर शेडचे काम सुरु असून, त्या शेडमध्ये मोठ्या प्रमाणात अवैधरित्या महाराष्ट्र जमीन महसूल कायदा 1966 कलम 48 (1) नुसार जमिनीखाली आवैधरीत्या उत्खनन करून भर टाकण्यात आली आहे. त्यासंदर्भात भाळवणी कामगार तलाठी व मंडलाधिकारी यांनी त्या जागेचा स्पॉट पंचनामा करून नियमाप्रमाणे गौण खनिजाच्या बाजारभावाच्या तीन पट दंड आकारण्यात यावा, त्याचप्रमाणे शेजारी अनेक ठिकाणी सीसीटिव्ही कॅमेरा असून त्या कॅमेऱ्याची तपासणी करून कलम 48 (8) अन्वये अवैध गौण खनिजाची वाहतूक करणाऱ्या वाहने जप्त करण्यात यावे.
शेडधारकांनी शासन महसूल व वन विभागाच्या निर्णयाची पायमल्ली करुन शासनाची रॉयल्टी मोठ्या प्रमाणात बुडवली आहे. त्यामुळे नगर-कल्याण महामार्गावर भाळवणी हद्दीमध्ये गट नंबर 37 पी मधील एच.पी. पेट्रोल पंपा समोर शेडमध्ये केलेले उत्खनन करून भर टाकण्यात आलेल्या जागेची जीपीएसद्वारे पंचनामा करून महाराष्ट्र जमीन महसूल कायदा 1966 कलम 48 (1) नुसार दंडत्मक कारवाई करण्याची मागणी करण्यात आली आहे.