पाईपलाईनची दुरुस्ती करुन स्वच्छ पाणी मिळण्याची मागणी
पंधरा दिवसांत समस्या सोडवा, अन्यथा आंदोलनाचा इशारा
नगर (प्रतिनिधी)- शहरातील स्टेशन रोड परिसरातील गवळीवाडा, बहरू चाळ, संभाजी कॉलनी, स्वामी समर्थ कॉलनी या भागात मागील एक ते दोन वर्षांपासून नागरिकांना मैलामिश्रीत दूषित पाणीपुरवठा होत असल्याने आरोग्याचा गंभीर प्रश्‍न निर्माण झाला आहे. या पाण्यातून पोटाचे विकार, त्वचारोग तसेच इतर आजार उद्भवू लागल्याने नागरिकांत संतापाची लाट उसळली आहे.
या गंभीर समस्येबाबत उपाययोजना करून नागरिकांना तातडीने स्वच्छ व पिण्यायोग्य पाणी उपलब्ध करून देण्याची मागणी महापालिका पाणीपुरवठा विभागाचे अभियंता गणेश गाडळकर यांच्याकडे निवेदनाद्वारे करण्यात आली. यावेळी भाजपचे दत्ता गाडळकर, विशाल खैरे, विजय गायकवाड, सुरेश लालबागे आदींसह नागरिक उपस्थित होते.
गेल्या दोन वर्षांपासून या भागात नळातून येणारे पाणी अत्यंत घाण व मैलामिश्रीत असून, अनेकदा तक्रारी करूनही संबंधित विभागाकडून दखल घेण्यात आलेली नाही. प्रत्यक्षात समस्येचे निराकरण झालेले नसल्याने नागरिकांना इतर ठिकाणाहून स्वच्छ पाणी आणावे लागत असल्याचे स्पष्ट करण्यात आले आहे.
वर्षानुवर्षे दूषित पाणीपुरवठा करणे म्हणजे नागरिकांच्या आरोग्याशी खेळणे आहे. महापालिकेने तातडीने लक्ष घालून ही समस्या दूर करावी, अन्यथा नागरिकांसोबत रस्त्यावर उतरून आंदोलन करण्याचा इशारा उपस्थितांनी यावेळी दिला.