पै. संदिप डोंगरे याची चितपट कुस्ती ठरली प्रेक्षणीय
अहमदनगर (प्रतिनिधी)- अकोळनेर (ता. नगर) येथे जिल्ह्यातील पैलवानांच्या कुस्त्यांचे मैदान रंगले होते. काळभैरवनाथ यांच्या यात्रेनिमित्त गावात झालेल्या कुस्त्यांच्या मैदानात चितपट कुस्त्यांचा थरार रंगला होता. या रंगतदार कुस्त्यांमध्ये पै. संदिप डोंगरे याने सात मिनीटात चितपट कुस्ती केली.
निमगाव वाघा येथील पै. संदिप डोंगरे विरुध्द नगर शहरातील पै. मोसिम शेख यांच्यात कुस्ती रंगदार झाली. यामध्ये पै. संदिप डोंगरे याने उत्कृष्ट कुस्तीचे प्रदर्शन करुन शेख याला घुटणा डावावर चितपट केले. चितपट कुस्ती करताच उपस्थितांनी टाळ्यांच्या कडकडाटात विजयी मल्लास दाद दिली. ग्रामस्थांनी विजयी मल्ल डोंगरे पैलवान याला रोख बक्षिस देऊन सत्कार केला.
यावेळी आमदार निलेश लंके, माजी जिल्हा परिषद सदस्य माधवराव लामखडे, शरद झोडगे, सरपंच प्रतिक शेळके, नगर तालुका तालिम सेवा संघाचे अध्यक्ष पै. नाना डोंगरे, महाराष्ट्र केसरी अशोक शिर्के, उपमहाराष्ट्र केसरी अनिल गुंजाळ, अजय अजबे, संजय गारुडकर, अविनाश जाधव, भगवान भोर, राजेंद्र शेळके, लक्ष्मण जाधव, काका गायकवाड, अनिल मेहेत्रे, विद्याताई भोर, बाळू शेळके, आदेश शेळके, पै. विकास निकम, बबन शेळके आदी उपस्थित होते.
या कुस्तीसाठी अतुल कावळे यांनी पंच म्हणून काम पाहिले. विजयी मल्ल संदिप हे नगर तालुका तालिम सेवा संघाचे अध्यक्ष तथा ग्रामपंचायत सदस्य पै. नाना डोंगरे यांचे चिरंजीव असून, तो वाडियापार्क तालिम येथे वस्ताद पै. अनिल गुंजाळ यांच्या मार्गदर्शनाखाली सराव करत आहे.