मराठमोळ्या वेशभुषेत विद्यार्थिनींनी सादर केलेल्या सांस्कृतिक कार्यक्रमातून स्त्री शक्तीचा जागर
तर विद्यार्थ्यांनी कराटेच्या धाडसी प्रात्यक्षिकांनी चुकविला ह्रदयाचा ठोका
अहमदनगर (प्रतिनिधी)- मुकुंदनगर येथील पी.ए. इनामदार शाळेत प्रजासत्ताक दिवस मोठ्या उत्साहात साजरा करण्यात आला. देशभक्ती जागविणार्या विविध कार्यक्रमांनी उपस्थितांची मने जिंकली.
तर सांस्कृतिक कार्यक्रमातून विद्यार्थ्यांनी भारतातील विविधतेमधील एकात्मतेचे दर्शन घडविले.
डोक्यावर फेटे बांधून मराठमोळ्या वेशभुषेत अवतरलेल्या विद्यार्थिनींनी सर्वांचे लक्ष वेधले. तर विद्यार्थ्यांनी कराटेच्या धाडसी प्रात्यक्षिकांनी उपस्थितांच्या ह्रदयाचा ठोका चुकविला. उपस्थित पालक व परिसरातील नागरिकांनी विद्यार्थ्यांच्या कलागुणांना टाळ्यांच्या कडकडाटात दाद दिली.
प्रारंभी अनामप्रेम संस्थेचे अध्यक्ष इंजि. अजित माने यांच्या हस्ते राष्ट्रध्वज फडकविण्यात आला. यावेळी चेअरमन अब्दुल रहीम खोकर, खजिनदार डॉ. खालिद शेख, सचिव विकार काझी, व्हाईस चेअरमन इंजि. इकबाल सय्यद, नाट्य अकादमीचे पुरस्कार प्राप्त अय्युब खान, प्राचार्य हारुन खान, उपप्राचार्या फरहाना शेख आदींसह विद्यार्थी व शिक्षक मोठ्या संख्येने उपस्थित होते.
बॅण्ड पथकाच्या निनादात विद्यार्थ्यांनी केलेल्या संचलनाने वातावरण प्रफुल्लित झाले होते. विद्यार्थ्यांनी सादर केलेले देशभक्तीवर गीते, लेझीम, रिंग, पॅराशुट व तिरंगी रिबीन नृत्याने उपस्थितांना मंत्रमुग्ध केले. कराटे, लेझीम, रिंगडास, पॅराशुट व रिबीन विविध कार्यक्रमांनी उपस्थितांची मने जिंकली.
अजित माने म्हणाले की, मुलांच्या उज्वल भवितव्यासाठी शिक्षणाचा पाया त्या पध्दतीने रचला गेला पाहिजे. या स्पर्धामय युगात शिक्षण क्षेत्र झपाट्याने बदलले असून, विद्यार्थ्यांनी सोयी-सुविधांचा उपयोग स्वत:च्या सर्वांगीन विकासासाठी करण्याचे आवाहन केले.
अय्युब खान यांनी विद्यार्थ्यांमध्ये अनेक कला-गुण दडलेल्या असतात. त्या ओळखून त्याचा विकास केल्यास समाजात एक ओळख निर्माण होते. तर शिक्षणाबरोबर कलागुणांद्वारे उत्तम करियरच्या संधी निर्माण झाले असल्याचे त्यांनी स्पष्ट केले.
कार्यक्रमाचे सूत्रसंचालन सुमय्या शेख, सरोज नायर यांनी केले. कार्यक्रम यशस्वी करण्यासाठी शाळेचे सर्व शिक्षक व शिक्षकेतर कर्मचार्यांनी परिश्रम घेतले.