अनागोंदी कारभाराला जबाबदार असणार्‍या त्या आरोग्य अधिकारीचे निलंबन करा
सामाजिक कार्यकर्ते कुरेशी यांचे आयुक्तांना निवेदन
अहमदनगर (प्रतिनिधी)- महापालिका आरोग्य विभागात असलेली अनागोंदी, दडविण्यात येणारी विविध माहिती, चुकीच्या प्रकाराला जाब विचारणार्‍यांना मिळणारे उडवाउडवीचे उत्तरे तसेच अनेक प्रकरणात दोषी असलेले आरोग्य अधिकारी यांच्यावर निलंबनाची कारवाईची मागणी करुन देखील त्याची दखल घेतली जात नसल्याने सामाजिक कार्यकर्ते तारिक कुरेशी यांनी आत्मदहनाचा इशारा दिला आहे. तर येत्या सात दिवसात मनपा आरोग्य अधिकारी डॉ. अनिल बोरगे यांचे निलंबन करण्याची मागणी त्यांनी मनपा आयुक्तांकडे निवेदनाद्वारे केली आहे.
महापालिकेचे आरोग्य अधिकारी बोरगे यांनी त्यांच्या अधिकारात असलेले जन्म-मृत्यू विभागातील फाटलेले रजिस्टर प्रकरणी विचारणा केली असता, बेजबाबदार वक्तव्य केलेले आहे. जुने दाखले काढण्यासाठी कोर्टात मोठा खर्च करावा लागतो. यापूर्वी अनेक नगरसेवकांनी पत्रव्यवहार करुन ऑनलाईन नोंदणी करुन घेण्यासाठी संबंधित विभागाला कळविले होते. मात्र त्यांच्या पत्राला केराची टोपली दाखविण्यात आली असल्याचे निवेदनात म्हंटले आहे.
शासन निर्णयानुसार जिल्हाधिकारी व आयुक्तांना कोविड सेंटरसाठी परवानगी देण्याचे अधिकार असताना, मनपा वैद्यकीय आरोग्य अधिकारी यांनी आर्थिक हितासाठी स्वतःच्या परवानगीने शहरात कोविड सेंटरला परवानग्या दिल्या. ज्या अधिकारात वैद्यकीय आरोग्य अधिकारी यांनी कोविड सेंटरच्या परवानगी दिल्या त्या शासनाच्या आदेशाची प्रत देखील संबंधित विभाग देण्यास तयार नाही.
कोरोना काळात तत्कालीन मनपा आयुक्त शंकर गोरे यांनी विविध मुद्दयांवर डॉ. बोरगे यांना दोषी ठरवून सक्तीच्या रजेवर पाठविले होते. त्यानंतर त्यांना पुन्हा पदावर रुजू करून घेण्यात आले. त्यांच्या प्राथमिक चौकशीचा अहवाल चौकशी अधिकारी यांनी सादर केला असताना देखील त्यांचे निलंबन झालेले नसल्याचे कुरेशी यांनी म्हंटले आहे.
राष्ट्रीय आरोग्य अभियान अंतर्गत कंत्राटी फार्मसीस्ट यांना खाजगी मेडिकल टाकता येते का? व खाजगी मेडिकल टाकण्याबाबत कोणाला परवानगी दिली?, तसेच एन.यु.एच.एम. विभाग अंतर्गत सर्व पदभरतीची माहिती देखील दडविण्यात आलेली असल्याचा आरोप कुरेशी यांनी केला आहे.