स्थानिक जनतेचा शहराच्या नामांतराला विरोधच
स्थानिक जनता, लोकप्रतिनिधी यांची नामांतराची मागणी नसताना पडळकर यांना कोणताही नैतिक अधिकार नाही
अहमदनगर (प्रतिनिधी)- जिल्ह्याचे लोकप्रतिनिधी नसलेले व जनतेने नाकारल्यानंतर मागच्या दाराने आमदार झालेल्या गोपीचंद पडळकर यांना अहमदनगरच्या नामांतराचा विषय काढण्यास कोणताही नैतिक अधिकार नाही. स्थानिक जनता, लोकप्रतिनिधी यांची नामांतराची अधिकृत मागणी नसताना देखील समाजा-समाजामध्ये द्वेष पसरविण्याचे काम शहराच्या नामांतराचा विषय घेऊन भाजप करीत असल्याचा आरोप सामाजिक कार्यकर्ते साहेबान जहागीरदार यांनी केला आहे. तर सर्वसामान्य स्थानिक जनतेचा नामांतराला विरोध असल्याचे त्यांनी प्रसिध्दीपत्रकाद्वारे स्पष्ट केले आहे.
राज्यातील बेरोजगारी, महागाई, शेतकर्‍यांच्या आत्महत्या आदी विविध ज्वलंत प्रश्‍न असताना, या प्रश्‍नांना बगल देऊन समाजात फक्त शहराच्या नावावरुन धर्मांधतेला खतपाणी घातले जात आहे. ज्यांना जनतेने देखील स्विकारले नाही, निवडणुकीत डिपॉझिट जप्त झालेल्या पडळकर यांनी दुसर्‍यांच्या शहरात नाक खुपसून घाणेरडे राजकारण चालवले असल्याचा टोला जहागीरदार यांनी लगावला आहे.
स्थानिक लोकप्रतिनिधींची याबाबत कोणतीही मागणी नसताना मागच्या दाराने विधान परिषदेत आमदार झालेल्या पडळकर यांच्या नामांतर विषयाची दखल घेण्याची गरज नव्हती. मात्र शासनाच्या सूचनेवरून नामांतरांचा प्रस्ताव महापालिकेकडे पाठविण्यात आला आहे. याबाबत कोणतीही कायदेशीर तरतुद नसताना महापालिकेच्या महासभेने देखील या प्रस्तावाला मंजुरी देऊ नये. शहराच्या नामांतराने कोणता मोठा बदल होणार नाही. अहमदनगर शहराला साडेपाचशे वर्षाचा मोठा इतिहास आहे.
राज्यातील हे एकमेव असे शहर आहे, की ज्याला स्थापना दिन आहे. अहमद निजामशहा बादशहाने हे शहर वसविले आहे. फक्त मुस्लिम नाव असल्याने नामांतराचा घाट घालून भविष्यातील राजकारण डोळ्यासमोर ठेवून जातीय तेढ निर्माण करण्याचा प्रयत्न सुरु आहे. अहमदनगर शहर इतिहासामध्ये कैरो, बगदाद सारखे वैभवशाली शहर होते. त्यामध्ये सर्व जाती, धर्म व समाजाचे नागरिक गुण्यागोविंदाने राहिल्याचा इतिहास आहे. मात्र वारंवार शहर नामांतराचा विषय चर्चेला जावून मुख्य प्रश्‍नांकडून जनतेचे लक्ष विचलित करण्याचे काम सुरु असल्याचे जहागीरदार यांनी म्हंटले आहे.
भारतीय जनता पार्टीने समाजात तेढ निर्माण करण्यासाठी पडळकर यांना मागच्या दारांनी आमदार केले आहे. धनगर समाजाचे प्रमुख नेते माजी पालकमंत्री प्रा. राम शिंदे आहे. तर ते अहिल्याबाई होळकर यांचे वंशजही आहेत. आज पर्यंत ते शहर नामांतरवर बोलले नाही. धनगर समाजाच्या आरक्षणाचा प्रमुख प्रश्‍न सोडून आयत्या बिलात आलेल्या पडळकर यांनी नामांतराची केलेल्या फुसफुसने जाती-पातीच्या राजकारणापलीकडे काही सिध्द होणार नसल्याचे सांगण्यात आले आहे.
