मेरिटच्या नावाखाली विद्यार्थ्यांचे शोषण होत असल्याचा मराठा महासंघाचा आरोप
महाविद्यालयाच्या शिक्षण पध्दतीची चौकशी करुन कारवाई करण्याची शिक्षणाधिकारी यांच्याकडे तक्रार
अहमदनगर (प्रतिनिधी)- सतत शिक्षणाच्या मानसिक त्रासाला कंटाळून महाविद्यालयीन युवकाने आत्महत्या केली असून, याला कारणीभूत असणारे सावेडी येथील त्या इंटरनॅशनल कॉलेजची शिक्षण व्यवस्था जबाबदार असून, याप्रकरणी चौकशी करुन संबंधीतांवर कारवाई करण्याची मागणी अखिल भारतीय मराठा महासंघाचे जिल्हा युवक अध्यक्ष अनिकेत कराळे पाटील यांनी माध्यमिकचे शिक्षणाधिकारी यांच्याकडे निवेदनाद्वारे केली आहे.
सावेडी येथे खाजगी क्लास चालकांनी एकत्र येऊन एका इंटरनॅशनल कॉलेजची स्थापना केलेली आहे. गेल्या रविवारी तेथील एका बारावी इयत्तेमध्ये शिकत असणार्‍या विद्यार्थ्याने राहत्या घरी आत्महत्या केली. त्याने केलेली आत्महत्या ही कॉलेजच्या शिक्षण व्यवस्थेचा बळी असल्याचा आरोप मराठा महासंघाचे जिल्हा युवक अध्यक्ष कराळे यांनी केला आहे.
या महाविद्यालयात संस्थाचालक तथा शिक्षक मेरिट मिळवण्याच्या नादाखाली शिकणार्‍या विद्यार्थ्यांचे मानसिक शोषण करीत आहेत. हे कॉलेज आठवडाभर सुट्टीविना सुरूच असते. सोमवार ते शनिवार शिक्षण आणि रविवारी साप्ताहिक चाचणी ठेवली जाते. या सगळ्या वेळापत्रकात विद्यार्थ्यांना थोडी देखील मानसिक उसंत मिळत नाही. नेहमी शैक्षणिक स्पर्धा आणि मेरिटच्या नावाखाली विद्यार्थ्यांचे मानसिक खच्चीकरण होऊन ते आत्महत्या करत असल्याचे स्पष्ट करण्यात आले आहे.
खाजगी क्लासेसच्या कुशीतून निर्माण झालेले हे कॉलेज एखाद्या कंपनीप्रमाणे असून, इतर कॉलेजच्या तुलनेत आपल्या कॉलेजचे जास्तीत जास्त विद्यार्थी मेरीट मध्ये येण्याची धडपड करीत आहे.
या मेरीटच्या नादात मुल घडविण्यापेक्षा त्यांचा जास्तीत जास्त मेरीट व अधिकाधिक नफा हा उद्देश आहे. या विद्यार्थ्यांची मैदानी खेळ व इतर उपक्रम घेतले जात नाही. तर त्या महाविद्यालयास खेळाचे मैदान देखील नाही. 24 तास अभ्यास आणि स्पर्धा सुरु असल्याने विद्यार्थी डिप्रेशन मध्ये जात आहे. शैक्षणिक व्यापाराच्या नादात कॉलेज विद्यार्थ्यांचे मानसिक स्वास्थ्याकडे लक्ष देखील दिले जात नसल्याचे निवेदनात म्हंटले आहे.
खाजगी क्लासेसच्या धर्तीवर उघडण्यात आलेले हे इंटरनॅशनल कॉलेज विद्यार्थी घडवत नसून, विद्यार्थ्यांचे बळी घेत असल्याचा आरोप करीत विद्यार्थ्याच्या आत्महत्येची सखोल चौकशी करुन कॉलेज प्रशासनावर कारवाई करण्याची मागणी करण्यात आली आहे. अन्यथा मराठा महासंघाच्या वतीने आंदोलन करण्याचा इशारा देण्यात आला आहे.
