शिक्षक परिषदेचे शिक्षण मंत्री व शिक्षण आयुक्तांना निवेदन
परीक्षा व त्यानंतर दिवाळी सुट्टीत आवेदन पत्र भरण्याचा काळावधी कमी असल्याचे स्पष्टीकरण
अहमदनगर (प्रतिनिधी)- प्रथम सत्र परीक्षा व त्यानंतर लागलेल्या दिवाळी सुट्टीच्या पार्श्‍वभूमीवर राष्ट्रीय आर्थिक दुर्बल घटक विद्यार्थी (एन.एम.एम.एस.) शिष्यवृत्ती परीक्षेचे आवेदन पत्र भरण्यास मुदत वाढ देण्याची मागणी महाराष्ट्र राज्य शिक्षक परिषदेच्या वतीने करण्यात आली आहे. या मागणीचे निवेदन शिक्षक परिषद मुंबई विभागाचे ार्यवाहक शिवनाथ दराडे व संघटन मंत्री सुभाष हिर्लेकर यांनी शिक्षण मंत्री दीपक केसरकर, शिक्षण आयुक्त यांना पाठविण्यात आले असल्याची माहिती शिक्षक परिषदेचे नेते बाबासाहेब बोडखे यांनी दिली.
महाराष्ट्र राज्य परीक्षा परिषद पुणे यांच्यामार्फत राष्ट्रीय आर्थिक दुर्बल घटक विद्यार्थ्यांसाठी शिष्यवृत्ती योजना परीक्षा (एन.एम.एम.एस.) 2022-23 चे आयोजन इयत्ता आठवीतील विद्यार्थ्यांसाठी करण्यात आलेले आहे. ही परीक्षा रविवार दि. 18 डिसेंबर 2022 रोजी होणार आहे.
या परीक्षेसाठीचे आवेदन पत्र 10 ऑक्टोंबर ते 31 ऑक्टोंबर या कालावधीत भरावयाचे आहेत. 19 ऑक्टोंबर पर्यंत शाळांमध्ये प्रथम सत्र परीक्षा चालू होत्या, त्यानंतर दिवाळीची सुट्टी सुरू झाली आहे. त्यातच पालकांना एवढ्या कमी अवधीत उत्पन्नाचा दाखला मिळवणेही अवघड आहे. यासाठी पुरेसा अवधी आवश्यक असून, त्यामुळे या शिष्यवृत्तीसाठीचे आवेदन पत्र भरण्यास मुदत वाढ देण्याची मागणी शिक्षक परिषदेने केली आहे.