विद्यार्थ्यांनी बनविलेले आकाश कंदील व भेटकार्डनी वेधले लक्ष
गड-किल्ले विद्यार्थ्यांना प्रेरणा देऊन इतिहासाविषयी आवड निर्माण करतात -अनिता काळे
अहमदनगर (प्रतिनिधी)- विद्यार्थ्यांच्या कला-गुणांना वाव देण्यासाठी व इतिहासाविषयी आवड निर्माण होण्याच्या उद्देशाने दिवाळीच्या पार्श्‍वभूमीवर भिस्तबाग येथील जिल्हा परिषदेच्या शाळेत गड-किल्ले बनविण्याचा उपक्रम राबविण्यात आला. यावेळी विद्यार्थ्यांनी पुस्तकात शिवरायांचा अचंबित करणारा पराक्रम डोळ्यासमोर ठेऊन गड-किल्ल्यांची हुबेहूब प्रतिकृती साकारली. तर आकर्षक आकाश कंदील बनवून आपल्या कल्पकतेने भेटकार्ड बनविले.
जिल्हा परिषद शाळेच्या उपक्रमशील मुख्याध्यापिका अनिता काळे यांच्या संकल्पनेतून हा उपक्रम राबविण्यात आला. चिखलात माखून गेलेल्या विद्यार्थ्यांनी दगड-विटांच्या थरावर मनसोक्त चिखलफेक करून त्यातून हुबेहूब गड, किल्ला बनवून आपल्या कलाकृतीचे दर्शन घडविले. तर विद्यार्थ्यांनी बनविलेले आकाश कंदील व भेटकार्डनी सर्वांचे लक्ष वेधले. तर पणत्यांना मुलींनी आकर्षक रंगांनी सजविले. इयत्ता पहिली ते चौथीच्या सर्व विद्यार्थी या उपक्रमात सहभागी झाल्या होत्या.
अनिता काळे म्हणाल्या की, किल्ले बनविणे ही आपल्या महाराष्ट्राची परंपराच आहे. आपल्या महाराष्ट्रात किल्ल्यांना एक आगळेवेगळे स्थान आहे. हे ऐतिहासिक किल्ले छत्रपती शिवाजी महाराज व त्या काळातील राजे-महाराजांनी केलेल्या पराक्रमाची साक्ष देतात. इतिहासकालीन पराक्रम आणि संघर्षाचे हे गड-किल्ले विद्यार्थ्यांना प्रेरणा देऊन इतिहासाविषयी आवड निर्माण करत असल्याचे त्यांनी सांगितले.
विद्यार्थ्यांच्या कला-गुणांना वाव मिळण्यासाठी राबविण्यात आलेल्या या उपक्रमास सुरेखा वाघ, शितल आवारे या सहशिक्षिकांचे मार्गदर्शन लाभले.