नव्याने सुरु झालेल्या नगर-आष्टी रेल्वेने केला प्रवास
लक्ष्मीबाई भाऊराव पाटील प्राथमिक विद्यालयाचा क्षेत्र भेटीचा उपक्रम
अहमदनगर (प्रतिनिधी)- पुस्तकी ज्ञानाचे धडे विद्यार्थ्यांना प्रत्यक्ष देण्याच्या उद्देशाने शहरातील रयत शिक्षण संस्थेच्या लक्ष्मीबाई भाऊराव पाटील प्राथमिक शाळेच्या विद्यार्थ्यांना रेल्वेची सफर घडविण्यात आली. विद्यार्थ्यांनी नव्याने सुरु झालेल्या नगर-आष्टी रेल्वे प्रवासाचा आनंद लुटला. तर रेल्वे स्थानकची पहाणी करुन रेल्वे कर्मचार्यांचे अनुभव ऐकून घेतले. रेल्वे प्रवासात नद्या, डोंगर, शेती, पूल, तलाव व रेल्वे थांबे आदींची माहिती जाणून घेतली.
सकाळी 7 वाजता रिमझिम पावसात शालेय विद्यार्थी अहमदनगर रेल्वे स्थानकवर दाखल झाले होते. प्लॅट फॉर्म क्रमांक 2 वर आलेल्या नगर-आष्टी रेल्वेत बसण्यासाठी रांगेने विद्यार्थी शिस्तबध्दपणे रेल्वेत दाखल झाले. रेल्वे सुटण्याची शिट्टी वाजताच विद्यार्थ्यांचा रेल्वे सफर सुरु झाला.
झुक झुक आगीनगाडी… विद्यार्थ्यांनी गीतं सादर केली. प्रवासादरम्यान विद्यार्थ्यांनी नारायण डोह, सोलापूर वाडी, कडा या रेल्वे स्टेशनची पहाणी केली. रेल्वे स्थानक, रेल्वे स्थानकाचा मार्ग, रेल्वे स्थानकातील तिकीट बुकिंग, रेल्वेतील डबे, रेल्वेत मिळणार्या सुविधा त्याचप्रमाणे रेल्वे तंत्रज्ञानाची माहिती विद्यार्थ्यांनी जाणून घेतली.
इयत्ता पहिली ते चौथी मधील 315 विद्यार्थ्यांची क्षेत्र भेट दरम्यान हा उपक्रम आयोजित करण्यात आला होता. आष्टी रेल्वे स्थानक येथे विद्यार्थ्यांनी सामुहिक जेवण करुन, पुन्हा त्याच रेल्वेने दुपारी अहमदनगर रेल्वे स्थानकावर परतले.
विद्यालयाचे मुख्याध्यापक शिवाजीराव लंके यांच्या संकल्पनेतून हा आगळा-वेगळा क्षेत्र भेटीचा उपक्रम पार पडला.
यावेळी स्कूल कमिटीचे चेअरमन ज्ञानदेव पांडुळे उपस्थित होते. ही रेल्वे सहल यशस्वी करण्यासाठी शालेय शिक्षक इम्रान तांबोळी, उर्मिला साळुंके, मिनाक्षी खोडदे, सुजाता दोमल, प्रदीप पालवे, राहुल शिंदे, प्रदीप गारुडकर, बाबासाहेब जगदाळे, शितल रोहोकले, सोनाली वेताळ, शिल्पा कानडे, सुनील रासकर आदींनी परिश्रम घेतले. आष्टीला सहलीसाठी आलेल्या विद्यार्थ्यांच्या अल्पोपहाराची व्यवस्था महेश धोंडे, ओंकार बुर्हाडे यांनी केली होती.
