राजेंद्र गवई यांनी जाहीर केली भूमिका; स्थानिक निवडणुकांसाठी महाविकास आघाडीला ‘एकच चिन्ह’ देण्याची मागणी
लहान पक्षांना संधी द्यावी; मोठ्या पक्षांचा हट्ट अयोग्य
अहिल्यानगर (प्रतिनिधी)- राहुरी विधानसभा पोटनिवडणुकीत रिपब्लिकन पक्षाला संधी द्यावी, यासाठी सक्षम उमेदवार देऊन निवडून आणला जाणार असल्याची भूमिका घेत रिपब्लिकन पक्षाचे नेते राजेंद्र गवई यांनी या जागेवर दावा जाहीर केला.
शनिवारी (दि. 22 नोव्हेंबर) घेण्यात आलेल्या पत्रकार परिषदेत ते बोलत होते. यावेळी शहर जिल्हाध्यक्ष सुशांत म्हस्के, शहराध्यक्ष दानिश शेख, तसेच विजय शिरसाठ, जमीर सय्यद, सचिन शिंदे यांच्यासह जिल्ह्यातील पदाधिकारी व कार्यकर्ते मोठ्या संख्येने उपस्थित होते.
राजेंद्र गवई पुढे म्हणाले की, यापूर्वी राहुरी विधानसभा जागेवरून रिपब्लिकन पक्षाला मागे सारण्यात आले; परंतु यापुढे हे सहन केले जाणार नाही. रिपब्लिकन पक्ष या पोटनिवडणुकीत स्वतःचा उमेदवार रिंगणात उतरवणार आहे. केंद्रीय निवडणूक आयोगाच्या नियमांनुसार रिक्त जागेवर सहा महिन्यांत निवडणूक होणे आवश्‍यक असून, राहुरीतून इच्छुक उमेदवारांचे अर्ज आले आहेत. यावेळी केवळ बौद्ध चेहरा नव्हे, तर योग्य आणि सक्षम उमेदवार देण्याचा पक्षाचा मानस असल्याचे त्यांनी स्पष्ट केले.
गवर्इ म्हणाले की, आघाडी टिकणार, पण स्थानिक समीकरणांनुसार वेगळी भूमिका शक्य आहे. रिपब्लिकन पक्ष मूलत: लोकशाही मूल्यांवर चालणाऱ्या पक्षांसोबत आहे. महाविकास आघाडीला कठीण काळात आम्ही खंबीर साथ दिली. काँग्रेससोबतची आघाडी कायम असूनही स्थानिक परिस्थिती, स्थानिक कार्यकर्त्यांचा हट्ट आणि जिल्हामतदारसंघातील वास्तव परिस्थिती लक्षात घेता वेगळी भूमिका घेण्याची शक्यता नाकारली जाणार नाही. मोठ्या पक्षांनी काही जागांवर हट्ट सोडून लहान पक्षांना संधी देणे गरजेचे असल्याचे त्यांनी अधोरेखित केले.
प्रत्येक वेळी रिपब्लिकन पक्षाला गृहीत धरले जाऊ नये. आगामी महापालिकेच्या निवडणुकीसंदर्भात रिपब्लिकन पक्षाची भूमिका स्पष्ट करताना गवई म्हणाले की, काँग्रेससोबत महापालिकेतही आघाडी टिकवली जाणार. परंतु शहरात पक्षाचे प्राबल्य असलेल्या अनेक भागांमध्ये 7 ते 8 जागांचा दावा केला जाणार आहे. अशा ठिकाणी सक्षम, जनाधार असलेले उमेदवार उभे केले जातील. मोठी ताकद उभी करण्यासाठी लहान पक्षांना बरोबर घेतले जाते; परंतु निर्णय घेताना मोठ्या पक्षांनीही दोन पावले लहान पक्षांसाठी मागे घेण्याची तयारी ठेवावी.
गवई यांनी प्रशासन आणि निवडणूक प्रक्रियेतील अनियमिततेकडेही लक्ष वेधले. डबल मतदार यादी आणि मत चोरीचा मुद्दा अजूनही कायम असल्याचे त्यांनी सांगितले. नगरपालिका व नगरपरिषद निवडणुकीत अर्ज छाननी आणि माघार प्रक्रियेनंतरही चिन्ह न देण्याचे प्रकार घडल्याचा प्रश्‍न उपस्थित केला. अनेक ठिकाणी झालेल्या बिनविरोध निवडणुका संविधानासाठी घातक असल्याचे मत व्यक्त केले. लोकशाही टिकण्यासाठी विरोधी पक्ष ताकदवान असला पाहिजे.
प्रकाश आंबेडकर यांनी रिपब्लिकन पक्षांच्या नेत्यांवर केलेल्या टीकेवर प्रतिक्रिया देताना गवई म्हणाले की, रिपब्लिकन पक्षांच्या नेत्यांवर त्यांनी टीका करण्याचे टाळावे. सर्वजण एकच विचार घेऊन कार्यरत असल्याचे ते म्हणाले.
स्थानिक निवडणुकांसाठी महाविकास आघाडीला ‘एकच चिन्ह’ देण्याची मागणी त्यांनी केली. स्थानिक स्वराज्य संस्थांच्या निवडणुकीत आघाडीतील सर्वांसाठी एकच निवडणूक चिन्ह असावे. विविध चिन्हांमुळे मतदारांमध्ये गोंधळ निर्माण होत असल्याने या मुद्द्यावर लवकरच घटक पक्षांच्या बैठकीत चर्चा केली जाणार असल्याचे ते म्हणाले.