संतुलित आहाराची संस्कृती रुजवणे हे आजच्या काळात अत्यावश्‍यक -डॉ. वसंत खळदकर
नगर (प्रतिनिधी)- भारतीय बालरोगतज्ज्ञ संघटनेच्या वतीने मुलांमध्ये योग्य पोषण व आरोग्यदायी जीवनशैलीसाठी पुढाकार घेण्यात आलेला आहे. आई-वडील, शिक्षक आणि पालक या सर्वांचं एकच उद्दिष्ट असून, मुलं निरोगी आणि आनंदी वाढली पाहिजेत. यासाठी सर्वात महत्त्वाचा पाया म्हणजे लहान वयातच आरोग्यदायी आहाराच्या सवयी निर्माण करणे असून, यासाठी भारतीय बालरोग तज्ञ संघटनेच्या माध्यमातून देशव्यापी जनजागृती मोहिम सुरु असल्याची माहिती संघटनेचे राष्ट्रीय अध्यक्ष डॉ. वसंत खळदकर यांनी दिली.
योग्य पोषण हा शारीरिक, मानसिक आणि भावनिक विकासासाठी अत्यंत आवश्‍यक घटक आहे. तो आयुष्यभर चांगल्या आरोग्याची आणि समतोल वाढीची पायाभरणी करतो. बालकांच्या आरोग्याचा पाया त्यांच्या ताटात असतो. मुलांमध्ये पोषणाबाबतची जागरूकता वाढवली, तर आपण त्यांना केवळ आज आरोग्यदायी ठेवत नाही, तर त्यांचे संपूर्ण आयुष्य घडवत असल्याचे डॉ. वसंत खळदकर यांनी म्हंटले आहे.
मुलांच्या आरोग्यदायी जीवनशैलीसाठी संतुलित आहाराचे महत्त्व अनन्य साधारण आहे. फळे व भाजीपाल्याद्वारे जीवनसत्त्वे, खनिजे व फायबरचा भरपूर स्रोत, प्रथिनं म्हणून अंडी, दुग्धजन्य पदार्थ, डाळी व कडधान्ये स्नायू आणि ऊतींच्या वाढीसाठी, संपूर्ण धान्ये ज्वारी, बाजरी, तांदूळ, ओट्स ऊर्जा आणि फायबर तसेच दुग्धजन्य पदार्थ: दूध, दही, चीज मजबूत हाडांसाठी कॅल्शियम आणि आरोग्यदायी फॅट्स: बदाम, अक्रोड, शेंगदाणे, ऑलिव्ह ऑईल मेंदूच्या विकासासाठी आवश्‍यक ठरते.
मुलांमध्ये आरोग्यदायी खाण्याच्या सवयी निर्माण करण्यासाठी आहारात विविधता आणणे आवश्‍यक आहे. मुलांना रंगीबेरंगी भाज्या, फळे व वेगवेगळ्या चवांची ओळख करून देणे, कुटुंबासोबत एकत्र जेवल्याने भोजनाशी सकारात्मक नाते तयार होते. स्वतःचे उदाहरण मुलांपुढे ठेवा, मोठ्यांचे खाण्याचे सवयी लहान मुले नकळत स्वीकारतात. प्रोसेस्ड अन्न आणि साखरयुक्त पेये टाळावे लठ्ठपणा, दातांचे विकार आणि ऊर्जा घसरण टाळण्यासाठी आहार खेळकर बनवणे व आहार सादर करताना कल्पकता वापरल्यास ते निश्‍चित मुलांना आवडत असल्याचे स्पष्ट करण्यात आले आहे.
भावनिक आणि सामाजिक आरोग्याचाही संबंध असून, फक्त शरीरासाठीच नव्हे, तर निरोगी आहार मानसिक संतुलन, चांगले मूड, आणि ऊर्जा टिकवून ठेवण्यास मदत करतो. कुटुंबासोबत घेतलेले जेवण भावनिक बंध वाढवतात आणि अन्नाबद्दल सकारात्मक दृष्टीकोन तयार करतात. निरोगी आहार ही आरोग्याची सुरुवात नाही, तर ती संपूर्ण आरोग्यदायी जीवनशैलीची गुरुकिल्ली आहे. आपल्या घरात, शाळांमध्ये आणि समाजात संतुलित आहाराची संस्कृती रुजवणे हे आजच्या काळात अत्यावश्‍यक असल्याचे डॉ. खळदकर यांनी स्पष्ट केले.