पूर्वी धर्मांतर केलेले सरदार बनले, तर सध्या भ्रष्टाचारामध्ये अखंड बुडालेल्या विरोधकांना सरकारमध्ये आणून मंत्रीपद!
भ्रष्टाचाराला आणि जाती-धर्माच्या भेदभावांना मूठ माती देण्याचे आवाहन
अहमदनगर (प्रतिनिधी)- सत्ताधारी भाजप सरकार इतिहासात मोगल सम्राट औरंगजेबच्या नितीचा अवलंब करुन भ्रष्टाचारामध्ये अखंड बुडालेल्या विरोधकांना सरकारमध्ये आणून मंत्री करत आहे. आणि त्यांच्या भ्रष्टाचाराचा सगळा पुरावा नष्ट करीत असल्याचा आरोप इंडिया अगेन्स्ट तमस स्लेवरी संघटनेच्या वतीने करण्यात आला आहे.
गेली शेकडे वर्षे भारतात ज्या राजनीतीचा वापर केला तीच नीती आज देखील वापरली जात आहे. औरंगजेबाने धर्मांतर करणाऱ्याला सरदार बनविले. इंग्रजांनी शूद्र अतिशूद्रांना लालूच दाखवून ख्रिश्‍चन बनविले आणि देशातील सत्ताधारी नरेंद्र मोदी आणि अमित शहा यांनी औरंगजेबच्या नितीचा अवलंब करुन भ्रष्टाचारामध्ये अखंड बुडालेल्या विरोधकांना सरकार मध्ये आणून मंत्रीपद दिल्याचे स्पष्ट करण्यात आले आहे.
सध्याचे राज्यकर्ते हे धर्माच्या नावावर सत्ता टिकवून ठेवण्यासाठी भ्रष्टाचारांच्या विरुद्ध ईडीची भीती दाखवून अनेक राज्य ताब्यात घेत आहेत. 2024 च्या निवडणुकीत भारतातील तमाम मतदारांनी जय शिवाजी, जय डिच्चू कावा तंत्राचा वापर केला पाहिजे आणि भ्रष्टाचाराला आणि जाती-धर्माच्या भेदभावांना मूठ माती दिली पाहिजे. औरंगजेबाचे तंत्र सत्ता टिकवण्यासाठी वापरणाऱ्यांना 2024 च्या निवडणुकीमध्ये थारा देता कामा नये, असे आवाहन संघटनेने केले आहे.
या सत्ताधाऱ्यांना छत्रपती शिवाजी महाराजांच्या नखाची सर करता येणार नाही. परंतु शरद पवार यांनी छत्रपती संभाजी महाराजांच्या पावलावर पाऊल ठेवून मोदींनी दाखवलेली लालूच फेटाळली. त्यामुळे छत्रपती शिवाजी महाराजांचा वारसा आज देखील देशात जिवंत आहे याचा अभिमान असल्याची भूमिका संघटनेने जाहीर केली आहे. याबाबत ॲड. कारभारी गवळी, कॉ. बाबा आरगडे, भ्रष्टाचार विरोधी जन आंदोलनाचे अशोक सब्बन, सुधीर भद्रे आणि पीपल्स हेल्पलाईनचे प्रकाश थोरात भूमिका मान्य केली आहे.
सतराव्या शतकामध्ये औरंगजेबने या धर्मनितीचा वापर केला. लोकांवर झिझिया कर बसविला. इंग्रजांनी त्याच मार्गाचा वापर केला. परंतु भारतातील जाती व्यवस्थेमुळे त्रस्त असलेल्या शूद्र अति अतिशूद्र लोकांवर सत्तेचा गैरवापर करून भारतातील कोट्यावधी लोकांना धर्मांतर केले. हीच नीती आज सत्ताधारी पक्षासाठी आणि सत्तेसाठी वापरत आहे. ईडीचा वापर भोकाडी म्हणून करत आहे. त्यामुळे त्यांच्याशी मिळालेले अनेक दिग्गज विरोधक नेते भाजपाचे मंडलिक वतनदार झाले आहेत. त्यामुळे देशातील लोकशाहीला फार मोठा धोका निर्माण झाला आहे. पूर्वीचे जम्मू-काश्‍मीरचे मुख्यमंत्री गुलामनबी आझाद यांनी काश्‍मिरी पंडितांना धर्मांतर करायला भाग पाडले. म्हणून काश्‍मीरमध्ये आज मुस्लिम समाज बहुसंख्येने आहे. परंतु धर्माचा जातीचा वापर राजकारणात करू नये अशी भूमिका नुकतीच आझाद यांनी मांडली आहे. छत्रपती शिवाजी महाराजांनी धर्माचा वापर मुसलमान विरुद्ध कधीही केला नाही. त्यामुळे सिकंदर, औरंगजेब किंवा इंग्रज राज्यकर्त्यांपेक्षा ते अधिक श्रेष्ठ ठरतात. परंतु सध्याचे भ्रष्टाचारी जय शिवाजी म्हणतात, परंतु शिवाजी महाराजांचा अनुकरण शासन-प्रशासनात करत नसल्याचे प्रसिध्दीपत्रकात म्हंटले आहे.