रविवारी होणार तमस चेतनामुक्ती सूर्य साक्षी गॅझेट प्रसिध्द
पीपल्स हेल्पलाईन व भारतीय जनसंसदेचा पुढाकार
अहमदनगर (प्रतिनिधी)- नवीन सुसंस्कारी पिढी घडविण्याच्या उद्देशाने पीपल्स हेल्पलाईन व भारतीय जनसंसदेच्या वतीने देशातील सर्व शाळा, महाविद्यालय व विद्यापीठांना तमस चेतनामुक्ती राष्ट्रपीठचा दर्जा देणारे सूर्यसाक्षी गॅझेट रविवारी 22 जानेवारी रोजी चांदबिबी महालावरून प्रसिध्द केले जाणार असल्याची माहिती अ‍ॅड. कारभारी गवळी यांनी दिली.
भारतातील माणसे उन्नत चेतनेअभावी लोककल्याणकारी कामे करत नाही. त्यामुळे स्वार्थ, सत्ता, संपत्ती आणि प्रतिष्ठेसाठी कर्तव्य आंधळी होऊन हे लोक तमस चेतनेच्या आहारी गेली आहे. त्यामुळे सार्वजनिक जीवनात भ्रष्टाचार, अनागोंदी आणि टोलवाटोलवी वाढली आहे. त्याचा परिणाम स्वातंत्र्याच्या 75 वर्षानंतर देखील सामान्य माणसाला स्वातंत्र्याची फळे मिळालेली नाहीत. निसर्गाचा र्‍हास झाला, सजीव सृष्टीचा घात होत आहे. त्यामुळे प्रत्येक व्यक्तीमध्ये असलेल्या तमस चेतनेच्या जागी उन्नत चेतना स्थापित करण्यासाठी विशेष प्रयत्नांची गरज असल्याचे संघटनेच्या वतीने स्पष्ट करण्यात आले आहे.
समाजहित, सजीव सृष्टी आणि निसर्गला नष्ट करू पाहणार्‍या तमस चेतना प्रवृत्तीची धारणा संहिता नष्ट करण्याची गरज आहे. त्यासाठी देशभरातील शैक्षणिक संस्थांचा वापर केला पाहिजे. आजपर्यंत शैक्षणिक संस्थांच्या माध्यमातून विद्यार्थ्यांना ज्ञान दिले जात आहे. परंतु अशा विद्यार्थ्यांच्या मनातून तमस चेतना नष्ट करून उन्नतचेतना जागी करण्याच्या दृष्टीने संघटनेने हे अभियान हाती घेतले आहे.
न्याय विक्री, मतांची विक्रीमुळे अपप्रवृत्ती वाढल्या आहेत. त्यामुळे न्यायालयं वारी न्यायालय बनले आहेत. शासन, प्रशासनातील भ्रष्टाचार वाढला आहे. यावर फक्त एकच उपाय तो म्हणजे, भारतात उन्नतचेतनेचा विस्फोट करणे होय. माहिती तंत्राबरोबर प्रत्येक व्यक्तीच्या मनात देशहित, समाजहित, निसर्गहित, सजीव सृष्टीहित निर्माण करणारी कार्यप्रवृत्ती आणण्याची गरज आहे. भारतात उन्नत चेतना विकासाचे तंत्र गेली पाच हजार वर्षे राबविले जाते.
परंतु सध्याच्या काळात जातीमंडूक आणि धर्मवेड्या लोकांमुळे संपूर्ण समाज उन्नत चेतनेपासून दुरावला आहे. त्यामुळे संपूर्ण मानव जातीचे नुकसान होत असल्याचे अ‍ॅड. गवळी यांनी म्हंटले आहे. या अभियानासाठी अ‍ॅड. गवळी, अशोक सब्बन, प्रकाश थोरात, सुधीर भद्रे, शाहीर कान्हू सुंबे, विठ्ठल सुरम, डॉ. महेबुब सय्यद, अर्शद शेख, कैलास पठारे आदी कार्यकर्ते प्रयत्नशील आहेत.