आनंदऋषीजी हॉस्पिटलच्या मोफत हृदयरोग तपासणी शिबिराला नागरिकांचा उत्स्फुर्त प्रतिसाद
मनगाव प्रकल्पाला आनंदऋषीजी हॉस्पिटल पुरविणार मोफत आरोग्यसेवा
अहमदनगर (प्रतिनिधी)- अहमदनगर ही साधू-संतांची पावन भूमी आहे. या भूमीतच मानवसेवेचे बीजे रोवली गेली असून, संतांच्या आशिर्वाद व त्यांच्या विचाराने मानवसेवेचे कार्य घडत आहे. माणसाला माणूस म्हणून जगविण्याचे कार्य आनंदऋषीजी हॉस्पिटल करत असल्याचे प्रतिपादन मनगाव प्रकल्पाचे संस्थापक डॉ. राजेंद्र धामणे यांनी केले.
जैन सोशल फेडरेशन संचलित आनंदऋषीजी हॉस्पिटल मध्ये आचार्य श्री आनंदऋषीजी महाराज यांच्या 109 व्या दीक्षा दिनानिमित्त ए.एच. पोखरणा ज्वेलर्स व पोखरणा परिवाराच्या सहकार्याने आयोजित मोफत हृदयरोग तपासणी शिबिराच्या उद्घाटनाप्रसंगी डॉ. धामणे बोलत होते. यावेळी हिरालाल पोखरणा, अनिल पोखरणा, भारती पोखरणा, वसंत लोढा, डॉ. आशिष भंडारी, कार्डिओलॉजिस्ट डॉ. राहुल अग्रवाल, डॉ. राजेंद्र गिरी, डॉ. वसंत कटारिया, निखलेंद्र लोढा, माणकचंद कटारिया, प्रकाश छल्लाणी, सतीश लोढा आदी उपस्थित होते.
पुढे डॉ. धामणे म्हणाले की, आहे. सामाजिक बांधिलकी जपण्याचे व्रत अंगीकारुन आनंदऋषीजी हॉस्पिटलची रुग्णसेवा सुरु आहे. जगा आणि जगू द्या! या संतांच्या विचाराने हॉस्पिटलचे सुरु असलेले कार्य दिशादर्शक असल्याचे त्यांनी सांगितले.
प्रास्ताविकात निखलेंद्र लोढा म्हणाले की, माणुसकीच्या भावनेने आनंदऋषीजी हॉस्पिटलचे कार्य सुरू आहे. या कार्यात पोखरणा परिवाराचे योगदान मिळत असल्याचे त्यांनी स्पष्ट केले. डॉ. वसंत कटारिया व डॉक्टर राहुल अग्रवाल यांनी पूर्वी मोठ्या शहरात बायपास सर्जरी तीन ते पाच लाख रुपये आकारले जायचे. त्यावेळी आनंदऋषीजी हॉस्पिटलमध्ये अवघ्या पन्नास हजार मध्ये शस्त्रक्रिया करण्यात आल्या. सध्या या शस्त्रक्रिया अल्पदरात व शासनाच्या योजनेतून पूर्णतः मोफत करण्यात येत आहे. महिन्याला 60 ते 70 बायपास सर्जरी यशस्वी होत असून, आजपर्यंत 45 हजार पेक्षा जास्त बायपास सर्जरी यशस्वी झाल्या आहेत. त्यामध्ये लहान मुलांचे देखील समावेश आहे. शस्त्रक्रिया बरोबर त्याचा दर्जा देखील सर्वोत्तम राखला गेला आहे हे विशेष बाब आहे. रुग्णसेवेसाठी सर्व अद्यावत तंत्रज्ञान व इम्पोर्टेड मटेरियल चा वापर होत असल्याची माहिती त्यांनी दिली.
वसंत लोढा म्हणाले की, आनंदऋषीजी हॉस्पिटलने आरोग्याची ईश्‍वररुपी मनुष्य सेवा समाजाला देऊन एक आदर्श निर्माण केला आहे. रुग्णसेवेचे कार्य करणारे डॉ. धामणे यांच्या हस्ते या रुग्णसेवा देणार्‍या शिबीराचे उद्घाटन होणे अभिमानास्पद गोष्ट आहे. अल्पदरात सर्वसामान्यांना रुग्णसेवा मिळत असून, ही मानव सेवा अखंडपणे सुरू असल्याचे त्यांनी कौतुक केले. अनिल पोखरणा म्हणाले की, मोठ्या शहराच्या धर्तीवर चांगली व कमी खर्चात रुग्णसेवा आनंदऋषीजी हॉस्पिटलमध्ये मिळत आहे. हा व्यवसाय नसून, मानवसेवेचे कार्य सुरु असून, या हॉस्पिटलमध्ये दवा बरोबर दुवा देखील मिळून रुग्ण बरा होऊन घरी जातो. या सेवाकार्यात सहभागी करुन घेतल्याबद्दल त्यांनी आभार मानले.
या शिबीरात 165 रुग्णांची मोफत हृदय तपासणी करण्यात आली. गरजेनुसार रुग्णांची बायपास सर्जरी, हृदयातील झडप बदलणे, हृदयातील छिद्र बुजविणे, लहान मुलांच्या हृदय शस्त्रक्रिया, अँजिओप्लास्टी, अँजिओग्राही अल्पदरात केल्या जाणार आहेत. तर महात्मा फुले जन आरोग्य योजनेअंतर्गत मोफत केल्या जाणार आहेत. विशेष म्हणजे या शिबीराच्या पार्श्‍वभूमीवर पुढील आठ दिवसासाठी अँजिओग्राही फक्त दोन हजार रुपयात केली जाणार आहे.
आनंदऋषीजी हॉस्पिटल मनगाव प्रकल्पाला पुरविणार मोफत आरोग्यसेवा