वासन टोयोटात मोफत नेत्र तपासणी व मोतीबिंदू शस्त्रक्रिया शिबिराला नागरिकांचा उत्स्फुर्त प्रतिसाद
424 रुग्णांची मोफत तपासणी तर 84 रुग्णांवर होणार मोतीबिंदू शस्त्रक्रिया
अहमदनगर (प्रतिनिधी)- जीवनात समाधानासाठी व्यवसायाला समाजसेवेची जोड असावी. वासन परिवार सामाजिक बांधिलकी व सचोटीने आपला व्यवसाय करत आहे. व्यवसायाबरोबर समाजातील गरजूंना त्यांनी नेहमीच मदतीचा हात दिला असून, ते ट्रस्टच्या माध्यमातून विविध सामाजिक उपक्रम राबवित आहे. तर संपूर्ण महाराष्ट्रात कार्यरत असताना राज्यातील अनेक युवकांना रोजगार देण्याचे काम त्यांनी केले असल्याचे प्रतिपादन आमदार संग्राम जगताप यांनी केले.
दृष्टीदोष असलेल्या गरजूंसाठी श्री कुंदनलाल तिलकचंद वासन चॅरिटेबल ट्रस्ट व साधु वासवानी मिशन संचलित बुधराणी हॉस्पिटल (पुणे) च्या वतीने आयोजित मोफत नेत्र तपासणी व मोतीबिंदू शस्त्रक्रिया शिबिराच्या उद्घाटनाप्रसंगी आमदार जगताप बोलत होते. वासन उद्योग समूहाचे चेअरमन विजयजी वासन यांच्या वाढदिवसानिमित्त केडगाव येथील वासन टोयोटा शोरुममध्ये या शिबिराचे आयोजन करण्यात आले होते. यावेळी घर घर लंगर सेवेचे हरजितसिंह वधवा, प्रीतपालसिंह धुप्पड, शोरुमचे जनक आहुजा, बुधराणी हॉस्पिटलचे रोहित वाघ, प्रकाश धर्माधिकारी, उद्योजक रवींद्र बक्षी, इंद्रजीतशेठ नय्यर, जय रंगलानी, राजीव बिंद्रा, हरमोहनसिंग सेठी, राकेश गुप्ता, प्रदीप पंजाबी, अभिमन्यू नय्यर, राजेंद्र कंत्रोड, अनिश आहुजा, दलजितसिंह वधवा, विपुल शहा, डॉ.सिमरनकौर वधवा, डॉ. प्रविण मुनोत, लोकेश मेहतानी, पप्पू भुतकर, अर्जुन मदान, किशोर मुनोत, विनिता रंगलानी, सुनिता आहुजा, कैलाश नवलानी, नेत्रदूत जालिंदर बोरुडे आदींसह नागरिक मोठ्या संख्येने उपस्थित होते.
पुढे आमदार जगताप म्हणाले की, सर्वसामान्यांच्या सेवेसाठी दरवर्षी नेत्रदोष असलेल्यांसाठी मोफत शिबीर घेऊन गरजूंवर मोतीबिंदूच्या शस्त्रक्रिया देखील केल्या जात आहे. गरजूंना दृष्टी देण्याचे महत्त्वाचे कार्य ते करत असून, या शिबीराने सर्वसामान्यांना आधार मिळत असल्याचे त्यांनी सांगितले.
प्रास्ताविकात जनक आहुजा यांनी वासन ग्रुपची स्थापना स्वर्गीय कुंदनलालजी वासन यांनी 1961 मध्ये नाशिक येथे केली. त्यांनी लावलेले छोट्याच्या रोपांचे आज विजय वासन आणि तरुण वासन यांनी मोठ्या वटवृक्षात रुपांतर केले. या उद्योग समुहाच्या वतीने सामाजिक सेवाभाव जपून श्री कुंदनलाल तिलकचंद वासन चॅरिटेबल ट्रस्टच्या माध्यमातून विविध सामाजिक कार्य केले जात असल्याचे त्यांनी सांगितले.
हरजितसिंह वधवा म्हणाले की, दरवर्षी होणार्‍या या शिबीराच्या माध्यमातून मोफत वंचितांच्या जीवनातील अंधकार दूर करण्याचे काम केले जात आहे. व्यवसायाला सामाजिक कार्याची जोड देऊन वासन ग्रुपचे सुरु असलेले कार्य दिशादर्शक असल्याचे त्यांनी सांगितले.
या शिबीरासाठी शहर व उपनगरात बारा ठिकाणी नोंदणी सेंटर ठेवण्यात आल्याने नागरिकांचा उत्स्फुर्त प्रतिसाद लाभला. यामध्ये संध्याकाळ पर्यंत तब्बल 424 रुग्णांची मोफत तपासणी करण्यात आली. तर 84 रुग्णांवर बुधराणी हॉस्पिटलमध्ये मोतीबिंदू शस्त्रक्रिया होणार आहेत. रुग्णांची तपासणी रोहित वाघ, सिस्टर माया आल्हाट, मनिषा कोरडे, अमित पिल्ले यांनी केली. तसेच यावेळी गरजूंना मोफत नंबरचे चष्मे देण्यात आले. कार्यक्रमाच्या ठिकाणी शिबीरार्थींसाठी जेवणाची देखील व्यवस्था करण्यात आली होती. आभार अनिश आहुजा यांनी मानले.
शिबीराला आमदार अरुणकाका जगताप यांनी भेट देऊन या उपक्रमाचे कौतुक केले. यावेळी त्यांच्या हस्ते 178 गरजू शिबीरार्थींना मोफत नंबरचे चष्म्यांचे वाटप करण्यात आले.
