फर्स्ट स्टेप प्री प्रायमरी स्कूलचा स्नेहसंमेलन उत्साहात
मुलांना मोबाईलच्या विश्‍वातून काढून मैदानी खेळासाठी घेऊन जावे -डॉ. दिपाली पटारे
अहमदनगर (प्रतिनिधी)- महाराष्ट्राचा अभूतपूर्व इतिहास सांस्कृतिक कार्यक्रमातून जिवंत करुन लोककलेचा नजराणा केडगाव येथील फर्स्ट स्टेप प्री प्रायमरी स्कूलच्या चिमुकल्या विद्यार्थ्यांनी सादर केला. शाळेच्या वार्षिक स्नेहसंमेलनानिमित्त हा सोहळा रंगला होता. रंगीबेरंगी पोशाख परिधान केलेल्या चिमुकल्यांनी नाटिका, नृत्य अशा विविध कार्यक्रमांनी उपस्थितांची मने जिंकली.
सरस्वती पूजन करुन दीपप्रज्वलनाने कार्यक्रमाचे उद्घाटन झाले. स्ट्रक्चरल इंजिनीअर वर्षा संदीप कुसळकर यांच्या अध्यक्षतेखाली झालेल्या कार्यक्रमाप्रसंगी प्रमुख पाहुण्या म्हणून डॉ. दिपाली पटारे, नगरसेवक मोहन पठारे, निवारा सामाजिक संस्थेच्या संचालिका नलिनी गायकवाड, एकनाथवाडी (ता. पाथर्डी) जिल्हा परिषद प्राथमिक विद्यालयाचे मुख्याध्यापक संजय कर्डिले, न्यु इंग्लिश स्कूलचे (पागोरी पिंपळगाव) नामदेव जठार, पोलिस निरीक्षक छगन कापसे, डॉ. सचिन आहेर, शालेय शिक्षिका दीपाली बनकर, उर्मिला ठाकूर, प्रिती गुंजाळ, सिद्धता गुंजाळ, श्रीमती ज्योती बोडखे आदी उपस्थित होते.
डॉ. दिपाली पटारे म्हणाल्या की, मुलांना मोबाईलच्या विश्‍वातून काढून मैदानी खेळासाठी घेऊन जावे. लहान वयात बालकांचा विकास होत असताना त्यांचे आहार व शारीरिक व्यायामाकडे विशेष लक्ष देण्याची गरज आहे. केमिकलयुक्त आहारापासून मुलांना दूर ठेऊन त्यांना सकस आहार देण्याचे त्यांनी आवाहन केले.
इंजि. वर्षा कुसळकर म्हणाल्या की, सर्वच क्षेत्रात आघाडीवर असलेल्या महिलांनी स्वसामर्थ्य ओळखून स्वतःची स्वतंत्र ओळख निर्माण करावी. न्युनगंड बाजुला सारुन स्वत:मधील क्षमता ओळखण्याची गरज आहे. कुटुंबासह समाज घडविण्याचे कार्य महिला करत आहे. तर शिक्षणासोबत बालकांचे बालपण जपणार्‍या फस्ट स्टेप प्री प्राईमरी स्कुलच्या विविध उपक्रमांचे त्यांनी कौतुक केले.
उपस्थित पाहुण्यांच्या हस्ते कला, क्रीडा व शैक्षणिक क्षेत्रातील गुणवंत विद्यार्थ्यांना बक्षीस वितरण करण्यात आले. लहान लहान मुलांनी सादर केलेल्या बहारदार सांस्कृतिक कार्यक्रमाने उपस्थित नागरिक व पालक वर्ग मंत्रमुग्ध झाले.
प्रास्ताविकात मोनिका कुसळकर यांनी शाळेत मुलांच्या सर्वांगीन विकासासाठी राबविण्यात येणार्‍या विविध उपक्रमाची माहिती दिली. कार्यक्रमाचे सूत्रसंचालन वैजयंती कातोरे व सुलोचना आडोळे यांनी केले. आभार रविंद्र कुसळकर यांनी मानले.