पीपल्स हेल्पलाईन व भारतीय जनसंसदेचा उपक्रम
कायद्याचे राज्य खर्‍या अर्थाने आणण्यासाठी राष्ट्रीय कर्तव्य योगाची घेणार शपथ
अहमदनगर (प्रतिनिधी)- पीपल्स हेल्पलाईन व भारतीय जनसंसदेच्या वतीने देशभरात कायद्याचे राज्य खर्‍या अर्थाने आणण्यासाठी चांदबिबी महालावर शनिवार दि. 28 जानेवारी रोजी राष्ट्रीय कर्तव्य योगाची शपथ घेऊन लोक कर्कासूर व न्याय कर्कासूरांचा कडेलोट केला जाणार आहे. तर समाजातील लोक कर्कासूर व न्याय कर्कासूर ओळखा शेजार्‍याला कळविण्याचा कार्यक्रम जारी केला जाणार असल्याची माहिती अ‍ॅड. कारभारी गवळी यांनी दिली.
निरंतर राष्ट्रीय कर्तव्य योग हा गीतेमधून समाजासमोर आला आहे. या योगाचा सर्वात मोठा वापर छत्रपती शिवाजी महाराजांनी स्वराज्य स्थापनेसाठी केला. देशाच्या स्वातंत्र लढ्यामध्ये आणि गेल्या दोन वर्षातील कोरोना महामारीच्या काळात या योगाचा मोठ्या प्रमाणात वापर झाल्यामुळे समाजामध्ये मोठ्या प्रमाणात उन्नत चेतना विकसित झाली असल्याचे संघटनेच्या वतीने स्पष्ट करण्यात आले आहे.
या देशात न्याय गंगोत्री आणि मतगंगोत्री प्रदूषित झाली आहे. मतगंगोत्री प्रदूषित करण्याला मतदान खरेदी करणार्‍या वोट माफीयांनी समाजविघातक कार्य केले. त्यामुळे दिल्लीपासून गल्लीपर्यंत मोठ्या संख्येने लोक मागच्या दाराने सत्तेत आले. त्यांनी जनतेच्या तिजोरीवर डल्ला मारला. त्याच वेळेला देशभरातील न्यायालयामध्ये न्याय खरेदी विक्रीने उन्नत चेतना अभावी मोठ्या प्रमाणात वारी न्यायालय निर्माण झाली असल्याचा आरोप संघटनेने केला आहे.
लोक कर्कासूरांमुळे देशातील लोकशाही अडचणीत आली आहे. तर न्याय मिळण्याची खात्री सर्वसामान्यांना लोक कर्कासूरांमुळे राहिली नाही. न्यायाची अंमलबजावणी करणे आणि कायदा मोडणार्‍यांवर कारवाई करणे, त्याचबरोबर देशभरात कायद्याचे राज्य खर्‍या अर्थाने आणण्यासाठी लोक कर्कासूर आणि न्याय कर्कासूर यांना मोडीत काढण्याची गरज आहे. रामायण, महाभारत, छत्रपती शिवाजी महाराजांनी स्वराज्य स्थापनेसाठीच्या संघर्षातून लोक कर्कासूर आणि न्यायकर्कासूर मोडीत काढल्याचा मोठा इतिहास संपूर्ण देशवासियांसमोर आहे. याच मार्गाचा वापर संघटना करणार असल्याचे अ‍ॅड. गवळी यांनी म्हंटले आहे.
लोक कर्कासूर आणि न्यायकर्कासूरांनी ओढलेला प्रतिष्ठेचा बुरखा फाडून त्यांना जनतेसमोर आणण्याचे कार्य या अभियानाद्वारे केले जाणार आहे. यातून समाजकंटक कायमचे संपवून, उन्नत चेतनेवर आधारित निरंतर राष्ट्रीय कर्तव्य योग राबविण्यात येणार आहे. यासाठी अ‍ॅड. गवळी, अशोक सब्बन, प्रकाश थोरात, सुधीर भद्रे, शाहीर कान्हू सुंबे, अर्शद शेख, कैलास पठारे आदी प्रयत्नशील आहेत.