उपप्रादेशिक परिवहन कार्यालय आणि जिल्हा रस्ता सुरक्षा समितीचा उपक्रम
अपघातात जीव गमावलेल्या व्यक्तींना श्रद्धांजली
अहमदनगर (प्रतिनिधी)- उपप्रादेशिक परिवहन कार्यालय आणि जिल्हा रस्ता सुरक्षा समिती अहमदनगर यांच्या वतीने रस्ते अपघातात जीव गमावलेल्या व्यक्तींना श्रद्धांजली वाहून अपघात टाळण्यासाठी वाहतुकीच्या नियमांचे पालन करण्याबाबत शहरातून जनजागृती रॅली काढण्यात आली. तर अपघातग्रस्तांचे जीवनदूत म्हणून कर्तव्य बजावण्याचे नागरिकांना माहिती पत्रकांचे वाटप करण्यात आले.
तारकपूर बस स्थानक येथे झालेल्या या कार्यक्रमाचे उद्घाटन दीपप्रज्वलनाने करण्यात आले. यावेळी सहाय्यक परिवहन अधिकारी संदीप खडसे, मोटार वाहन निरीक्षक आयशा हुसेन, तारकपूरचे आगर व्यवस्थापक मनीषा देवरे, कार्यशाळा अधीक्षक अभिजीत आघाव, मंगेश बर्डे आदींसह उपप्रादेशिक परिवहन कार्यालय व एसटी महामंडळाचे अधिकारी, कर्मचारी, मोटार ड्रायव्हिंग स्कूलचे संचालक व प्रवासी नागरिक मोठ्या संख्येने उपस्थित होते.
सहाय्यक परिवहन अधिकारी संदीप खडसे म्हणाले की, स्वत:च्या सुरक्षिततेसह इतरांच्या सुरक्षिततेसाठी वाहतुकीचे नियम पाळणे आवश्यक आहे. अपघातात एखादा कर्ता पुरुष दगावल्यास तो संसार उघड्यावर येतो. कुटुंबीयांच्या जबाबदारीचे भान ठेवून प्रत्येकाने अपघात टाळण्यासाठी वाहतुकीचे नियम पाळावे. अपघात झाल्यानंतर घटनास्थळी असलेल्या नागरिकांनी जीवनदूतची भूमिका पार पाडताना, जखमींचा जीव वाचविण्यासाठी त्यांना तातडीने रुग्णालयात घेऊन जाण्याबाबत त्यांनी मार्गदर्शन केले.
या कार्यक्रमात अपघात व्यक्तीस मदत करण्याच्या उद्देशाने जीवनदूतची कर्तव्य व महत्त्व सांगणारे माहिती पत्रकाचे अनावरण करुन ते नागरिकांसह वाहनचालकांना वाटण्यात आले. सुकन्या क्षेत्रे यांनी उपस्थितांना वाहतुकीचे नियम पाळणे व अपघात ग्रस्तांना मदत करण्याची शपथ दिली. गोरक्ष कोरडे यांनी जीवनदूतची माहिती दिली.
तारकपूर ते डीएसपी चौक दरम्यान वाहतुकीच्या नियमांचे पालन करण्याअचे व अपघात ग्रस्तांसाठी जीवनदूतची भूमिका पार पाडण्याची जनजागृती रॅली काढण्यात आली. या रॅलीत सर्व अधिकारी वर्ग पायी सहभागी झाले होते. कार्यक्रमाचे सूत्रसंचालन राहुल सरोदे, सूरज उबाळे यांनी केले. आभार मोटार वाहन निरीक्षक आयशा हुसेन यांनी मानले.
