खोटे बोल पण रेटून बोल यात व्यवहारे पटाईत
78 अ नुसार आयुक्तांनी प्रक्रिया करण्याचे न्यायालयाचे निर्देश
अहमदनगर (प्रतिनिधी)- बँकेत अपहार, गैरव्यवहार झाला, हे आता कागदोपत्री स्पष्ट झाले आहे. त्याचमुळे कोर्टाने 1960 कलम 78 अ नुसार सहकार आयुक्त यांनी प्रक्रिया करावी असे निर्देश दिले आहेत. बँकेत नुकतेच रिजर्व बँकेच्या अधिकार्‍यानीं अचानक बँकेत येऊन कामकाजाचा डाटा ताब्यात घेऊन व तपासण्या केल्या आहेत. तसेच कलम 83 ची चौकशी लागली असल्याने बँकेत गैरकारभार करणार्‍या दोषींची आता सुटका नाही, असा दावा संचालक सुदाम कोथिंबीरें, बबनराव दिघे यांनी केला आहे.
पारनेर तालुका सैनिक सहकारी बँकेवर कोर्टाने 1960 कलम 78 अ नुसार सहकार आयुक्त यांनी प्रक्रिया करावी असे निर्देश दिले आहेत. बँकेत मुख्यकार्यकारी आधिकारी संजय कोरडे व चेअरमन शिवाजी व्यवहारे यांनी मनमानी करत कर्तव्य व जबाबदारीचे पालन केले नसल्यामुळे संचालक मंडळावर गंडांतर येणार आहे. मात्र चेअरमन शिवाजी व्यवहारे हे प्रशासक लागणार नाही असा दावा करत आहेत. यातून व्यवहारे कोरडे यांचे व त्यांना पाठीशी घालणार्‍या, आणि गडबडीत नुसत्या सह्या करणार्‍यांना नादान संचालकांचे सहकारातील अज्ञान उघड झाले आहे. प्रत्येक संचालक मंडळाच्या मिटींग वेळी चेअरमन यांनी मला जायचंय, आज खूप गडबड आहे. लवकर आवरा मिटींग असं म्हणत कोणाला काही बोलू न देता, कोणाला काही समजू न देता कामकाज आवरून घेऊन सगळ्या संचालकांच्या प्रोसेडींगवर सह्या करून घेऊन झाले की, बाकी संचालक निघून गेल्यावर दिवसभर बँकेतच तळ ठोकून पैसे हडपण्याचे नियोजन करायचे! असला सगळा कार्यक्रम. गेली पाच वर्षे हा प्रकार चालू होता. आशा कामकाजामुळे चेअरमन यांनी आता सर्व सयाजीराव संचालकांना चांगलंच अडचणीत आणलं असल्याचा आरोप करण्यात आला आहे.
विनायक गोस्वामी यांनी प्रशासक लावण्याच्या याचिकेवर उच्च न्यायालयाने खेद व्यक्त करताना म्हटले की, सहकार खात्याने बँक संचालक मंडळावर कारवाई करण्यास दिरंगाई केली त्यामुळेच न्यायालयात दाद मागण्याची वेळ याचिकाकर्त्यांवर आली. चार आठवड्यात कलम 78अ (प्रशासक नियुक्तीचा) संदर्भात निर्णय घ्यावा परंतु संचालकांना त्यांचे म्हणणे मांडण्याची संधी द्यावी तसेच बँक संचालक मंडळाची मुदत संपली असली तरी आधी कारवाई करावी मगच निवडणूक घ्यावी तशा सूचना सहकार आयुक्तांनी राज्य निवडणूक प्राधिकरणाला देत त्यांना अवगत करावे असे स्पष्ट शब्दात सांगितले आहे.
सहकार संस्था 1960 च्या 78 अ या कलमाने गैरप्रकार करणारे संचालक निष्प्रभावीत करणे, काढून टाकणे. यासाठी वापरला जातो तर कलम 83 च्या कलमाणे गैव्यवहारप्रकरणी कामकाजाची चौकशी करयासाठी केला जातो. सहकार आयुक्त पुणे यांना संचालक सुदाम कोथिंबीरें, बबनराव दिघे यांच्यासह संचालक संतोष यादव व बबनराव सालके यांनीही प्रशासक नेमणुक करावी म्हणून पत्र दिले असल्याने व्यवहारे कोरडे यांचा गैरकारभार चव्हाट्यावर येणार आहे.
संचालकांना सयाजीरावची भूमिका भवली!
मुख्यकार्यकारी आधिकारी संजय कोरडे यांनी संचालक मंडळाला नोकर भरती सारखे आमिष दाखवले त्यामुळे संचालकांनीं फक्त सयाजीरावाची भूमिका निभावली. त्याचा फायदा कोरडे यांनी उठवत त्यांच्या मर्जीतील 10/12 कर्मचार्‍यांना भ्रष्ट कारभारात सामील करून घेतले व प्रामाणिक काम करणार्‍या कर्मचार्‍यांची पिळवणूक केली. बँकेत गैरव्यवहार केल्याने कोरडे व त्यांच्या टीमवर अनेक आर्थिक गुन्हे दाखल आहेत. कोरडे यांनी मुख्य व्यवस्थापकाची जबाबदारी प्रामाणिकपणे निभावली नसल्याने स्वतः सह आम्हाला ही गोत्यात आणले. बँकेत अपहार, भ्रष्टाचार झाला, हे कुणीही लपवू शकत नाही. आता बँकेत झालेल्या गैरकारभावर कारवाईचे सत्र सुरू झाले असून, दोषींना त्यांचे कर्म एक दिवस दिसून येईलच. बँकेच्या गैरव्यवहाराला अध्यक्ष व मुख्यकार्यकारी आधिकारी संजय कोरडेच जबाबदार असल्याचा आरोप करताना बँकेतील हुकूमशाही वृत्ती कलम 83 च्या चौकशीत हद्दपार होणार आहे. -बबनराव दिघे