शनिवारी चांदबिबी महालावरुन अभियानाची सुरुवात
पीपल्स हेल्पलाईन व भारतीय जनसंसदेचा पुढाकार
अहमदनगर (प्रतिनिधी)- शासन, प्रशासनातील अनागोंदी, टोलवाटोलवी व भ्रष्टाचार संपविण्यासाठी आणि समाज शोषक असलेल्या न्याय कर्कासूरांना संपविण्याच्या दृष्टीकोनाने पीपल्स हेल्पलाईन व भारतीय जनसंसदेच्या वतीने रक्तहीन डिच्चू कावा क्रांतीची हाक देण्यात आली आहे. शनिवारी 28 जानेवारी रोजी चांदबिबी महालावरुन या अभियानाची सुरुवात होणार असल्याची माहिती अ‍ॅड. कारभारी गवळी यांनी दिली.
गेल्या 30 ते 35 वर्षात ज्येष्ठ समाजसेवक अण्णा हजारे प्रणित भ्रष्टाचारविरोधी जन आंदोलनाने गल्लीपासून दिल्लीपर्यंत रक्तहीन डिच्चू कावा क्रांतीने यशस्वी केली. त्यातून सन 2014 साली मनमोहन सिंगाचे केंद्रातील सरकार देखील जनतेने फेकून दिले. स्वातंत्र्योत्तर काळात अण्णा हजारे यांनी लोक कर्कासूर ओळखून सूर्यसाक्षीने लोकांसमोर अशा सत्तेतील भ्रष्ट व्यक्तींना जनतेसमोर आणल्यामुळे पुढे जाऊन ते सार्वजनिक जीवनातून कायमचे संपल्या. त्याचाच भाग म्हणून जनसामान्यामध्ये रक्तहीन डिच्चू कावा क्रांती नेण्यासाठी संघटना प्रयत्नशील असून, अस्सल लोकशाहीची स्थापना नक्कीच करता येणार असल्याचे संघटनेने स्पष्ट केले आहे.
न्याय कर्कासूर ओळखा आणि शेजार्‍याला कळवा असा आग्रह संघटनेने धरल्यामुळे न्याय खरेदी विक्री करणार्‍या लोकांना जनतेसमोर उघडे पाडता येणार आहे. स्वत:चे उखळ पांढरे करण्यासाठी न्याय विक्री करणार्‍या न्याय कर्कासूरांना या मोहिमेद्वारे संपविण्याचे कार्य केले जाणार आहे.
रामायण व महाभारतातील मूळ सूत्रामधून समाज शोषक संपविण्याची शिकवण मिळते. या शिकवणीतून छत्रपती शिवाजी महाराजांनी लोक कल्याणकारी राज्य आणले. ब्रिटीश राजवटीविरोधात महात्मा गांधी यांनी सत्याग्रही मार्गाने रक्तहिन डिच्चू कावा क्रांती केली असल्याचे म्हंटले आहे.
सार्वजनिक जीवनातून भ्रष्ट लोकांना कायमचे दूर करण्यासाठी रक्तहिन डिच्चू कावा क्रांती जनसामान्यांपर्यंत व घराघरात पोहचविण्याचे कार्य या अभियानाद्वारे केले जाणार आहे. या अभियानासाठी अ‍ॅड. गवळी, अशोक सब्बन, प्रकाश थोरात, सुधीर भद्रे, शाहीर कान्हू सुंबे, विठ्ठल सुरम, डॉ. मेहबूब सय्यद, अर्शद शेख, कैलास पठारे आदी प्रयत्नशील आहेत.