राष्ट्रवादी युवक काँग्रेसचे जिल्हाधिकारी कार्यालया समोर निदर्शने
युवकांना बेरोजगार करुन महाराष्ट्राचा आर्थिक कणा मोडित काढण्याचे काम केंद्र व राज्य सरकार करत असल्याचा आरोप
अहमदनगर (प्रतिनिधी)- वेदांता आणि फॉक्सकॉन प्रकल्प गुजरातला गेल्याच्या निषेधार्थ जिल्हाधिकारी कार्यालयावर मोर्चाने येऊन राष्ट्रवादी युवक काँग्रेसच्या वतीने निदर्शने करण्यात आली. राज्य व केंद्र सरकारच्या विरोधात जोरदार घोषणाबाजी करुन गुजरातला प्रकल्प पळविणार्‍या केंद्र सरकारचा निषेध नोंदविण्यात आला.
या आंदोलनात राष्ट्रवादी युवकचे शहर जिल्हाध्यक्ष इंजि. केतन क्षीरसागर, राष्ट्रवादीचे शहर जिल्हाध्यक्ष प्रा. माणिक विधाते, कार्याध्यक्ष अभिजीत खोसे, युवकचे जिल्हाध्यक्ष कपिल पवार, कार्याध्यक्ष संजय कोळगे, मनोज भालसिंग, अनंत गारदे, सुरेश बनसोडे, साहेबान जहागीरदार, अमित खामकर, वैभव ढाकणे, अंजली आव्हाड, सुनिता गुगळे, योगिता कुडिया, नितीन लिगडे, महारुद्र किर्तने, विक्रम कळमकर, संतोष आघाव, रोहन साबळे, अक्षय भालेराव, कृष्णा गायकवाड, केतन काळे, जॉय लोखंडे, गजेंद्र दांगट आदींसह युवक व सर्व सेलचे पदाधिकारी, कार्यकर्ते मोठ्या संख्येने सहभागी झाले होते.
महाराष्ट्र राज्यात वेदांता व फॉक्स्कॉनसाठी सर्व भौगोलिक परिस्थिती (वीज, पाणी, रस्ते), आवश्यक परवानगी व अन्य सुविधा अनुकूल असूनही प्रकल्प गुजरातला पळविण्यात आला आहे. यामुळे तमाम महाराष्ट्रातील युवक युवतींचा रोजगार हिरावला गेला. महाराष्ट्रात युवकांच्या हाताचे काम हिरावण्याचे काम करुन महाराष्ट्राचा आर्थिक कणा मोडित काढण्याचे काम केंद्र व राज्य सरकार करत असल्याचा आरोप करण्यात आला आहे. या प्रकरणाची जबाबदारी राज्य सरकारने स्विकारुन रोजगार निर्मिती करुन व हा प्रकल्प पुन्हा महाराष्ट्रात आनण्याची मागणी राष्ट्रवादी युवक काँग्रेसच्या वतीने करण्यात आली आहे.
युवकचे शहर जिल्हाध्यक्ष इंजि. केतन क्षीरसागर म्हणाले की, महाराष्ट्रात भौगोलिक परिस्थिती योग्य असूनही गुजरातला हा प्रकल्प पळविण्यात आला. ज्या महाराष्ट्र राज्याने आजपर्यंत संपूर्ण देशाला मोठया प्रमाणात गुंतवणुक आकर्षित करुन रोजगार उपलब्ध करुन दिला, त्या राज्यातील तरुणांना बेरोजगार करण्याचे काम केंद्र व राज्य सरकारने केले आहे. तो प्रकल्प पुन्हा महाराष्ट्रात आणावा व युवक युवतींना रोजगाराच्या संधी उपलब्ध करून देण्याचे त्यांनी स्पष्ट केले.
प्रा. माणिक विधाते म्हणाले की, महाराष्ट्र राज्यातील युवकांना बेरोजगार करण्याचे काम ईडीचे सरकार करत आहे. या प्रकल्पासाठी पूर्वीच्या सरकारने सर्व अटी व शर्ती मान्य करुन, अधिक इन्सेटिव्ह देऊ करुन देखील हा प्रकल्प केंद्राच्या सांगण्यावरून गुजरातला घेऊन जाण्यात आला आहे. केंद्र सरकार राज्य तोडण्याचे व देशाचे कंबरडे मोडण्याचे काम करत आहे. शिंदे-फडणवीस बोलघेवडे सरकार असून, आमदार व केंद्राला खुश ठेवण्याचे काम करत आहे. राज्याच्या नुकसानाची त्यांना चिंता नसून खुर्ची टिकवण्याची त्यांना अधिक चिंता आहे. हा प्रकल्प महाराष्ट्रात पुन्हा येणे सोपे नव्हे, यापेक्षा मोठे प्रकल्प आणण्याचे गोष्टी केल्या जात असल्या तरी एखादा मोठा प्रकल्प येण्यासाठी मोठा कालावधी जात असल्याचे त्यांनी सांगितले. अंजली आव्हाड यांनी डळमळीत पन्नास खोक्याचे सरकार राज्याने पाहिले आहे. या राज्य सरकारच्या नाकर्तेपणामुळेच हा प्रकल्प बाहेर गेला आहे. यामुळे युवकांचा रोजगार हिरावण्याचे निंदनीय काम करण्यात आले असल्याचे त्यांनी सांगितले.
अभिजीत खोसे म्हणाले की, दीड लाख युवकांचा रोजगार हिरावून राज्य सरकारच्या नाकावर टिच्चून वेदांता आणि फॉक्सकॉन प्रकल्प गुजरातला घेऊन जाण्यात आला आहे. फक्त हा प्रकल्प गेला नाही, तर यामध्ये महाराष्ट्राची अस्मिता व स्वाभिमान सरकारने गमाविला आहे. तरी देखील राज्य सरकार फक्त हार-तुरे घेण्यातच मशगूल असल्याचा त्यांनी आरोप केला. तर महाराष्ट्रातून औद्योगिक प्रकल्प जात राहिल्यास राज्याची बरबादी होणार असल्याचे त्यांनी स्पष्ट केले. कपिल पवार यांनी राज्य सरकारच्या नाकर्तेपणामुळेच युवकांवर बेरोजगारीची कुर्‍हाड कोसळली असल्याचे स्पष्ट करुन केंद्र व राज्य सरकारच्या धोरणाचा निषेध नोंदवला.
