गावात ग्रामस्वच्छता अभियानाद्वारे वाडी-वस्तीवर जाऊन होणार फवारणी
कीटकनाशक फवारणीने शंभर टक्के हा रोग अटोक्यात येणार -डॉ. भगवान चौरे
अहमदनगर (प्रतिनिधी)- जिल्ह्यातील पशुधनांमध्ये लम्पी स्कीन या संसर्गजन्य रोगाचा प्रादुर्भाव वाढत असताना नगर तालुक्यातील पोखर्डी येथे ग्रामपंचायतच्या माध्यमातून प्रतिबंधात्मक उपाय म्हणून कीटकनाशकांची (धुराची) फवारणी करण्यात आली. तर लम्पीच्या प्रतिबंधासाठी गावात ग्रामस्वच्छता अभियानाची सुरुवात करण्यात आली असून, वाडी-वस्तीवर जाऊन गोठा व परिसरात कीटकनाशकांची फवारणी केली जाणार आहे.
या अभियानाप्रसंगी सरपंच रामेश्‍वर निमसे, उपसरपंच अजय कराळे, ग्रामपंचायत सदस्य व पशुसेवक डॉ. भगवान चौरे, ग्रामपंचायत सदस्य अंतू वारुळे, शिवाजी ढवळे, जगन्नाथ निमसे, दिगंबर शिंदे, ग्रामसेवक सचिन पवार आदी उपस्थित होते.
डास, माश्या, चिलटे, गोचीड यांच्या माध्यमातून जनावरांना लम्पी स्कीनचा आजाराचे संक्रमण वाढत आहे.
याला प्रतिबंध करण्यासाठी ग्रामपंचायत सदस्य व पशुसेवक डॉ. भगवान चौरे यांच्या मार्गदर्शनाखाली ग्रामपंचायत व ग्रामस्थांनी कीटकनाशकांची फवारणीचा उपक्रम हाती घेतला आहे. गावाच्या गावठाण पासून या अभियानाची सुरुवात करण्यात आली असून, संपुर्ण सप्ताह हे अभियान सुरु राहणार असल्याचे त्यांनी सांगितले.
डॉ. भगवान चौरे म्हणाले की, लम्पी स्कीन या संसर्गजन्य रोगाचे प्रतिबंध करण्यासाठी सर्वात महत्वाचे म्हणजे गोठ्याची स्वच्छता आवश्यक आहे. म्हैस वर्गामध्ये लंम्पी रोगाची बाधा होत नसल्यामुळे घाबरण्याचे कारण नाही. डास, माश्या, चिलटे, गोचीड यांना कीटकनाशक फवारणीने शंभर टक्के हा रोग अटोक्यात येणार असल्याचे त्यांनी सांगितले. तर चुकीच्या अफवांना बळी न पडता पशुवैद्यकिय यांचा सल्ला घेण्याचे त्यांनी आवाहन केले. या उपक्रमासाठी ग्रामपंचायतचे कर्मचारी विक्रम काळे, शिवाजी गायकवाड, संजय देठे परिश्रम घेत आहे.
