रिपाईच्या (गवई) अहमदनगर शहरातील राष्ट्रीय कार्यकारणी बैठकीत स्वबळाचा नारा
रिपाईच्या राष्ट्रीय अध्यक्षपदी एस. राजेंद्रन यांची नियुक्ती
अहमदनगर (प्रतिनिधी)- माजी महसूल मंत्री यांनी रिपाईला संपविण्याची सुपारी घेतली असल्याचा आरोप रिपब्लिकन पार्टी ऑफ इंडियाचे (गवई) राष्ट्रीय नेते डॉ. राजेंद्र गवई यांनी पत्रकार परिषदेत केली. गवई म्हणाले की, अकोले, अमरावती येथे येऊन मित्र पक्षाला संपविण्याची भाषा माजी महसूल मंत्री बाळासाहेब थोरात यांनी केली. काँग्रेसला ताकत देणार्‍या मित्र पक्षांनाच संपविण्याची भाषा करणारे संपल्याशिवाय राहणार नसल्याचा इशारा त्यांनी दिला.
रिपब्लिकन पार्टी ऑफ इंडिया (गवई) पक्षाची राष्ट्रीय कार्यकारणीची बैठक शनिवारी (दि.10 डिसेंबर) टिळक रोड येथील एका हॉटेल मध्ये पार पडली. यावेळी झालेल्या पत्रकार परिषदेत गवई बोलत होते. पुढे गवई म्हणाले की, देशातील कोणत्याही महापुरुषांबद्दल गैरउद्गार काढणे चुकीचे असल्याचे स्पष्ट करुन, त्यांनी चंद्रकांत पाटील यांचा नामउल्लेख टाळून वक्तव्याचा निषेध नोंदवला. तर सावरकर किंवा छत्रपती शिवाजी महाराज, डॉ. बाबासाहेब आंबेडकर, तर महात्मा फुले आदी महापुरुषांबद्दल वारंवार होणारे चुकीचे वक्तव्य निषेधार्ह आहे. सर्वच महापुरुषांचे देशांच्या जडणघडणीत मोलाचे कार्य आहे. राजकारण करताना कोणत्याही महापुरुषांवर चुकीचे विधान करणे म्हणजे राजकारणातील पातळी घसरल्याचे लक्षण आहे. पूर्वी वैचारिक मतभेद होते. मात्र सध्या सर्वांचे वैयक्तिक मतभेद निर्माण झाली आहेत. या मतभेदामुळे समाजात देखील फूट पडत असल्याचे त्यांनी स्पष्ट केले.
रिपब्लिकन पार्टी ऑफ इंडिया (गवई) पक्षाची राष्ट्रीय कार्यकारणी बैठक सुरु होण्यापूर्वी पक्षातंर्गत विविध पदांसाठी निवडणुका पार पडल्या. रिपाईच्या या बैठकीत एस. राजेंद्रन यांची राष्ट्रीय अध्यक्षपदी बिनविरोध निवड घोषित करण्यात आली. राष्ट्रीय सरचिटणीसपदी डॉ.राजेंद्र गवई, तर राष्ट्रीय खजिनदारपदी रामराव दाभाडे यांची निवड घोषित करण्यात आली. या निवडीनंतर राष्ट्रीय कार्यकारिणीची बैठक पार पडली.
या बैठकीत पक्षाच्या ध्येय धोरणावर चर्चा करुन भविष्यातील अजेंडा ठरविण्यात आला. पक्षात आलेली मरगळ झटकण्यासाठी गवई यांनी पदाधिकारी व कार्यकर्त्यांना मार्गदर्शन केले. त्यांनी आरपीआयची ताकद वाढवून सर्व निवडणुका स्वबळावर लढविण्याची तयारी करण्याचे कार्यकर्त्यांना सूचना केल्या. ज्या पक्षाकडून पदाधिकारी व कार्यकर्त्यांना सन्मानाची वागणूक मिळेल त्या पक्षाबरोबर युती केली जाणार असल्याचे सुतोवाचही केले. याबाबत स्थानिक पातळीवरील जिल्हाध्यक्षांना पूर्ण अधिकार राहणार असल्याचेही त्यांनी सांगितले.
राष्ट्रीय अध्यक्ष एस. राजेंद्रन यांनी केंद्रातील सत्ताधारीच्या हुकुमशाही पध्दतीने वागत असल्याने संविधान धोक्यात आले आहे. मागासवर्गीय व अल्पसंख्याक समाजाने जागरूक होण्याची गरज आहे. वेळीच जागरूक न झाल्यास गंभीर परिणाम भोगावे लागणार असल्याचे त्यांनी सांगितले. शहर जिल्हाध्यक्ष सुशांत म्हस्के यांनी देशातील विविध राज्यातून आलेल्या रिपाईच्या पदाधिकार्‍यांचे स्वागत करुन, घराणेशाहीला बगल देण्याचे काम रिपाईने केले आहे. सर्वसामान्य कार्यकर्त्यांना पदाच्या माध्यमातून काम करण्याची संधी देण्यात आली आहे. कार्यकर्त्यांनी पदाच्या माध्यमातून काम करुन पक्ष बळकट करण्याचे त्यांनी सांगितले.
या राष्ट्रीय कार्यकारणी बैठकीसाठी रिपाईचे राज्य अध्यक्ष सुबोध वाघमोडे, जिल्हा रिपाईचे अध्यक्ष सुधाकर रोहम, उत्तर महाराष्ट्र अध्यक्ष सुरेश देठे, उत्तर महाराष्ट्र सरचिटणीस किशोर वाघमारे, शहराध्यक्ष सुशांत म्हस्के, दानिश शेख, गुलाम शेख, संतोष पाडळे, संदीप वाघचौरे, जावेद सय्यद, नईम शेख, विजय शिरसाठ, किशोर वाघमारे, सुधाकर रोहम, सुरेश देठे, जमीर इनामदार, बाळासाहेब पाळंदे, संपदा म्हस्के, ज्योती पवार, अलका बोर्डे, पूजा साठे, प्रकाश भटेजा, दिनेश पाडळे, भिमा वाकचौरे आदींसह राष्ट्रीय व राज्य कार्यकारणी पदाधिकारींसह जिल्ह्यातील पदाधिकारी मोठ्या संख्येने उपस्थित होते.
