नवीन वर्षात जिल्ह्यात 3 हजार सक्रीय सभासद नोंदणीचे उद्दीष्ट
देशात राष्ट्रवादाचा अतिरेक करुन सत्ताधार्‍यांची धर्मांधता -कॉ.प्रा. डॉ. राम बाहेती
अहमदनगर (प्रतिनिधी)- भारतीय कम्युनिस्ट पक्षाचे कार्य लोकशाही पद्धतीने चालते. देशात हुकुमशाही पध्दतीने अराजकता माजवणार्‍या सरकारला घालवण्यासाठी समविचारी पक्षांना एकत्र यावे लागेल. राष्ट्रवादाचा अतिरेक करुन धर्मांधता पसरवली जात आहे. याला रोखण्याचे काम करणारे कम्युनिस्टांच्या मेंदूची भीती सत्ताधार्‍यांना असल्याने ते कम्युनिस्टांना संपवण्याचा प्रयत्न करत असल्याचे प्रतिपादन भाकपचे राज्य सहसेक्रेटरी कॉ.प्रा. डॉ. राम बाहेती यांनी केले.
भारतीय कम्युनिस्ट पक्षाच्या जिल्हा कौन्सिलची बैठक बुरुडगाव येथील जिल्हा पक्ष कार्यालयात पार पडली. यावेळी मार्गदर्शन करताना कॉ. बाहेती बोलत होते. कॉ. बाबा आरगडे यांच्या अध्यक्षतेखाली झालेल्या या बैठकिसाठी भाकपचे राज्य सेक्रेटरी कॉ.अ‍ॅड. सुभाष लांडे, कॉ. स्मिता पानसरे, कॉ. बन्सी सातपुते, कॉ. अ‍ॅड. सुधीर टोकेकर, संतोष खोडदे, भारती न्यालपेल्ली, भैरवनाथ वाकळे, संजय नांगरे, लक्ष्मण नवले, धोंडिभाऊ सातपुते, बापूराव राशिनकर, कैलास शेळके, निवृत्ती दातीर, दशरथ हासे, भगवान गायकवाड, बबनराव लबडे, दत्तात्रय आरे, सतिश पवार, प्रताप साहाणे, सगुना श्रीमल, संगिता कोंडा, सुलाबाई आदमाने, कार्तिक पासलकर, अरुण थीटे, दिपक शिरसाठ, चंदकांत माळी, नितीन वेताळ, मारूती सावंत आदींसह जिल्ह्यातील पदाधिकारी व कार्यकर्ते मोठ्या संख्येने उपस्थित होते.
पुढे बाहेती म्हणाले की, धर्मनिरपेक्ष आणि लोकशाही पर्याय निर्माण करण्याच्या दिशेने भाकपची वाटचाल सुरु आहे. सर्व धर्मनिरपेक्ष, लोकशाही आणि देशभक्त शक्तींना एकत्र आणण्याची गरज त्यांनी बोलून दाखवली. तर आंध्रप्रदेश विजयवाडा येथे झालेल्या पाच दिवसीय महा अधिवेशनाची माहिती दिली. क्रांतिसिंह नाना पाटील यांच्या कन्या दिवंगत क्रातिविरांगना हौसाताई पाटील यांच्या नावाने सुरु केलेला प्रथम पुरस्कार भारतीय महिला फेडरेशनच्या राज्य अध्यक्ष कॉ. स्मिता पानसरे, भाकपच्या राज्य सहसेक्रेटरीपदी निवड झाल्याबद्दल कॉ. राम बाहेती व आयटकच्या राष्ट्रीय कौन्सिलपदी निवड झाल्याबद्दल कॉ. अ‍ॅड. सुधीर टोकेकर यांचा सत्कार करण्यात आला.
कॉ. सुभाष लांडे म्हणाले की, 2024 च्या लोकसभा निवडणुकीचे उद्दीष्ट समोर ठेवून भाजप व त्यांचे मित्र पक्ष देशातील प्रमुख प्रश्‍न समोर येऊ नये, यासाठी विविध बिनकामाचे मुद्दे उपस्थित करुन नागरिकांचे लक्ष विचलीत करत आहे. भांडवलशाही व धार्मिक ध्रुवीकरणाचे परिणाम थेट जनतेवर होत असतात. यामुळेच पाकिस्तानची परिस्थिती गंभीर बनली आहे. या परिस्थितीला लगाम लावण्यासाठी प्रयत्न करावे लागणार आहे. भांडवलशाही देशात प्रश्‍न निर्माण करून शेतकरी, कामगार, कष्टकरी यांचे शोषण करत असल्याचे त्यांनी स्पष्ट केले.
प्रास्ताविकात कॉ. बन्सी सातपुते यांनी कॉ. पानसरे यांचा खून होऊन सहा वर्षे होऊन मुख्य आरोपी सापडत नाही. 20 फेब्रुवारी रोजी राज्यभर जिल्हा कचेरीवर आंदोलन केले जाणार असल्याचे त्यांनी सांगितले. तर पुढील तीन वर्षाच्या कार्यकाळासाठी कोणते कार्यक्रम करावयाचे याची केलेली आखणी व कोणत्या प्रश्‍नांवरती जन चळवळी उभ्या करता येतील याबद्दल सांगितले.
कॉ. अ‍ॅड. सुधीर टोकेकर यांनी नवीन कामगार कायदे जो पर्यंत मागे घेतले जात नाही, तो पर्यंत संघर्ष सुरु राहणार आहे. कामगारांच्या शोषणासाठी व भांडवलदारांच्या हितासाठी कामगार कायद्याची निर्मिती केली गेली असल्याचे त्यांनी सांगितले. तसेच यावेळी प्रमुख पदाधिकार्‍यांनी आपल्या भाषणात सध्याची परिस्थिती व पक्षाची वाटचाल यावर भाष्य केले. बैठकीत नवीन वर्षात भाकपची सभासद नोंदणी व 3 हजार सक्रीय सभासद करण्याचे उद्दीष्ट पदाधिकार्‍यांसमोर ठेवण्यात आले. सूत्रसंचालन कॉ. संजय नांगरे यांनी केले. आभार कॉ. अ‍ॅड. सुधीर टोकेकर यांनी मानले.