तर विद्यार्थ्यांसह पालकांना मानसिक आजारांविषयी मार्गदर्शन
अहमदनगर जिल्हा रुग्णालयाचा उपक्रम
अहमदनगर (प्रतिनिधी)- निर्व्यसनी व सक्षम युवा पिढी घडविण्यासाठी, तर समाजात वाढत चाललेली व्यसनाधिनता रोखण्यासाठी अहमदनगर जिल्हा रुग्णालयाच्या वतीने शहरातील स्नेहालय संचलित बालभवनमध्ये व्यसनमुक्तीचा जागर करुन मानसिक आजारांविषयी मार्गदर्शन करण्यात आले.
शहरातील झोपडपट्टीभागात स्नेहालय संचलित बालभवन केंद्र मुलांच्या सर्वांगीन विकासासाठी कार्य करत आहे. या सेवा वस्तीत व्यसनमुक्ती व मानसिक आजार जनजागृती सप्ताह जिल्हा शल्य चिकित्सक डॉ. संजय घोगरे यांच्या मार्गदर्शनाखाली जिल्हा मानसिक आरोग्य कार्यक्रमातंर्गत राबविण्यात आला.
शहरातील सिद्धार्थनगर येथील डॉ. ए.पी.जे. अब्दुल कलाम बालभवन, संजयनगर काटवन खंडोबा येथील डॉ.एस.के. हालबे बालभावन, रामवाडी, सर्जेपुरा परिसरातील क्षितीज व परिस बालभवन तसेच मुकुंदनगर येथील मलाला बालभवन येथे विद्यार्थी व पालकांना मानसिक आजार, नैराश्य, उदासीनता, चिंता, विकृती इत्यादी विषयी मार्गदर्शन करण्यात आले.
तर युवकांमध्ये दारु, तंबाखू, गुटखा इत्यादींची वाढत चाललेली व्यसनाधिनता व त्याचे दुष्परिणाम सांगण्यात आले. या व्यसनापासून लांब राहण्याचेही मार्गदर्शन यावेळी करण्यात आले. या सप्ताहात मानसोपचार तज्ञ डॉ. तेजस्विनी मिस्कीन व मिनल कटकोळ, गोरक्ष ईंगुले, विवेक मगर व अनिकेत केदारी यांनी मार्गदर्शन केले. या कार्यक्रमाच्या नियोजनामध्ये बालभवन प्रकल्पाच्या समन्वयक उषा खोलम यांचे विशेष सहकार्य लाभले.
