प्रशासक बेकायदेशीर बांधकामांना प्रोत्साहन देत असल्याचा आरोप
सैनिक समाज पार्टीचे जिल्हा उपनिबंधकांना निवेदन
अहमदनगर (प्रतिनिधी)- शहरातील अहमदनगर कृषी उत्पन्न बाजार समितीच्या आवारात सुरु असलेले बेकायदेशीर बांधकाम तात्काळ थांबवून संबंधित गाळेधारक व इंजिनिअर यांच्यावर गुन्हे दाखल करावे व झालेले बेकायदेशीर बांधकाम पाडण्याची मागणी सैनिक समाज पार्टीच्या शिष्टमंडळाने जिल्हा उपनिबंधक गणेश पुरी यांची भेट घेऊन निवेदनाद्वारे केली. यावेळी सैनिक समाज पार्टीचे जिल्हाध्यक्ष रावसाहेब काळे, शहराध्यक्ष विलास शिंदे, दत्ता वामन, आशा गायकवाड, दिपक वर्मा आदी उपस्थित होते.
कृषी उत्पन्न बाजार समिती मध्ये गैर कारभार झाल्यामुळे अनेक तक्रारी झाली आहेत. या अनुषंगाने 2018 मध्ये सहाय्यक निबंधक एस.डी. सूर्यवंशी यांची नियुक्ती करण्यात आली होती. बाजार समिती 1999 साली भविष्यात कुठेही बांधकाम करता येणार नसल्याचा ठराव बाजार समितीने केला होता. याबाबत जून 2018 मध्ये चौकशी अहवाल सादर करण्यात आला. या अहवालात अनेक गंभीर बाबी समोर आल्या. त्यानुसार चौकशी अधिकारी सूर्यवंशी यांनी कृषी उत्पन्न बाजार समिती कलम 40 (ई) नुसार निर्देश देणे सोयीचे होईल असा अहवाल शासनास पाठवला. असे असताना कृषी उत्पन्न बाजार समितीवर प्रशासकाची नेमणुक करण्यात आली. मात्र त्यांनी सदर अहवालानुसार कुठल्याही प्रकारची दखल घेतलेली नसून, अतिशय भ्रष्ट कारभार करुन त्यांनी बेकायदेशीर बांधकामांना प्रोत्साहन दिल्याचा आरोप सैनिक समाज पार्टीने केला आहे.
बाजार समितीच्या आवारात प्रवेशद्वारात चार ते सहा सुरक्षारक्षक दररोज असतात. त्यांच्यासह सुपरवायझर देखील दिवस-रात्र ड्युटी करतात. बांधकामासाठी लागणारे मटेरियल या गेटमधून आत येत असते. बांधकामाचे मटेरियल रस्त्यावर उतरवून बांधकाम केले जातात. संबंधित कर्मचारी यांची ड्युटी असतानाही चार मजली अनाधिकृत इमारत दिमाखात उभी राहत असल्याचे निवेदनात म्हंटले आहे.
कृषी उत्पन्न बाजार समितीच्या आवारात सुरु असलेल्या सर्व बांधकामाचे पंचनामे करून संबंधितांवर गुन्हे दाखल करावे, सर्व प्रकारची खातेनिहाय चौकशी करून याला जबाबदार प्रशासक व कर्मचार्‍यांचे निलंबन व्हावे, बेकायदेशीर बांधकाम करणारे गाळेधारकांचा परवाना रद्द करण्याची मागणी सैनिक समाज पार्टीने केली आहे. याप्रकरणी दखल न घेतल्यास जिल्हा उपनिबंधक कार्यालयात ठिय्या आंदोलन करण्याचा इशारा देण्यात आला आहे.
