आमदार संग्राम जगताप यांनी शहराला विकासाचे व्हिजन दिले -अनंत गारदे
अहमदनगर (प्रतिनिधी)- राष्ट्रवादीच्या वतीने विकास हे ध्येय व उद्दिष्ट ठेवून कार्य सुरू आहे. पदाधिकारी व कार्यकर्त्यांनी पक्षाच्या माध्यमातून झालेली विकासकामे जनतेपुढे घेऊन जाण्याची गरज आहे. आमदार संग्राम जगताप यांचे विकासाच्या दृष्टीकोनाने कामे सुरु आहेत. जनतेचे प्रश्‍न सोडवण्याचे काम करुन त्यांनी शहराला विकासाचे व्हिजन दिले असल्याचे प्रतिपादन राष्ट्रवादी व्यापार व उद्योग सेलचे शहर जिल्हाध्यक्ष अनंत गारदे यांनी केले.
एक तास राष्ट्रवादीसाठी, आगामी महाराष्ट्राच्या विकासासाठी या उपक्रमांतर्गत प्रभाग क्र.12 गांधी मैदान परिसरातील नागरिक, पक्षाचे पदाधिकारी व लोकप्रतिनिधी यांचा संवाद कार्यक्रम पार पडला. यावेळी राष्ट्रवादीचे शहर जिल्हाध्यक्ष प्रा. माणिक विधाते, ओबीसी सेलचे अमित खामकर, संतोष ढाकणे, सावेडी विभाग प्रमुख धीरज उकिर्डे, भिंगार राष्ट्रवादीचे शहराध्यक्ष संजय सपकाळ, मारुती पवार, उमेश धोंडे, नंदनसिंह परदेशी, अरुण खिची, नितीन गारदे, सचिन गारदे आदींसह पदाधिकारी, कार्यकर्ते व नागरिक उपस्थित होते.
प्रा. माणिक विधाते म्हणाले की, पक्षाचे विचार व ध्येय धोरणाबरोबर सामाजिक कार्य घेऊन गेल्यास जनता पक्षाबरोबर जोडली जाणार आहे. प्रत्येक कार्यकर्त्यांनी दिलेली जबाबदारी प्रामाणिकपणे पार पाडावी. पक्षात संख्येपेक्षा वैचारिक पातळी असलेले कार्यकर्ते महत्त्वाचे आहेत. शहरात मागील 25 वर्षाचा बॅक लॉग भरुन काढण्याचे कार्य आमदार संग्राम जगताप करत आहे. शहराला शहरीकरणाचे रूप प्राप्त करून देण्यासाठी ते योगदान देत आहेत.
शहराच्या विकासासाठी भरीव निधी आणून त्यांनी अनेक विकास कामे मार्गी लावली असल्याचे सांगितले. तर भविष्यातील तीस ते चाळीस वर्षाचा विचार करून शहरात विकास कामे केली जात असल्याचे त्यांनी स्पष्ट केले. उपस्थित पदाधिकारी व नागरिकांनी आपल्या भावना मांडून शहराच्या विविध विषयांवर चर्चा केली.
