आरोग्याचा जागर करीत राष्ट्रीय युवा सप्ताहाचे उद्घाटन

जिल्हा क्रीडा कार्यालय, नेहरू युवा केंद्र व प्रगती फाउंडेशनचा संयुक्त उपक्रम

आरोग्याची काळजी घेऊन सदृढ व सक्षम समाजाची निर्मिती होणार -पुष्पा बोरुडे

अहमदनगर (प्रतिनिधी)- आरोग्याची काळजी घेऊन सदृढ व सक्षम समाजाची निर्मिती होणार आहे. युवक व महिलांनी आरोग्याकडे लक्ष देणे गरजेचे आहे. उत्तम आरोग्य हीच खरी संपत्ती असून, आरोग्य चांगले राहण्यासाठी व्यायाम व सकस आहाराकडे वळण्याची गरज बनली आहे. सदृढ आरोग्य अनेक आजारांना दूर पळवतो व जीवन सुखी-आनंदी बनवतो, असे प्रतिपादन नगरसेविका पुष्पा बोरुडे यांनी केले.

जिल्हा क्रीडा कार्यालय, नेहरू युवा केंद्र व प्रगती फाउंडेशनच्या वतीने आरोग्याचा जागर करीत राष्ट्रीय युवा सप्ताहाचे उद्घाटन करण्यात आले. यावेळी नगरसेविका बोरुडे बोलत होत्या. यावेळी प्रमुख पाहुण्या म्हणून शासनाचा राज्य आदर्श युवती पुरस्कार प्राप्त जयश्री शिंदे, स्त्रीरोगतज्ञ डॉ. रश्मी कुलथे, दंतरोगतज्ञ डॉ. अमोल जाधव, डॉ. सोनल थोदानी, प्रगती फाउंडेशनच्या अध्यक्षा, अश्‍विनी वाघ, अनिता गणगे, कविता डवरे, प्रिया भांडेकर आदींसह महिला मोठ्या संख्येने उपस्थित होत्या.

सावेडी येथील महावीरनगर येथे झालेल्या या कार्यक्रमाच्या प्रारंभी राजमाता जिजाऊ व स्वामी विवेकानंद यांच्या प्रतिमेस अभिवादन करुन, महिलांची आरोग्य तपासणी व बालकांची दंत तपासणी शिबिराचे उद्घाटन करण्यात आले. पाहुण्यांचे स्वागत स्वामी विवेकानंद यांच्या जीवन चरित्रावरील पुस्तके भेट देऊन करण्यात आले. राजमाता जिजाऊ व स्वामी विवेकानंद यांच्या वेशभुषेत अवतरलेल्या चिमुकल्यांनी सर्वांचे लक्ष वेधले.

डॉ. अमोल जाधव म्हणाले की, फास्टफुडमुळे आरोग्य व दातांवर विपरीत परिणाम होत आहे. लहान मुलांपासून ज्येष्ठांपर्यंत दातांचे विकार झपाट्याने वाढले आहे. कमी वयात दात काढल्याने त्याचा आरोग्यावर देखील परिणाम होतो. आरोग्याच्या दृष्टीने दात देखील शरीरातील महत्त्वाचा घटक असून, त्याची काळजी घेण्याचे त्यांनी सांगितले.

डॉ. रश्मी कुलथे म्हणाल्या की, महिलांच्या हातात संपूर्ण आरोग्याची जबाबदारी असते. तिने स्वत:च्या आरोग्याची काळजी घेतल्यास इतरांचे आरोग्य चांगले राखता येणार आहे. महिलांमध्ये व्यायामाचा अभाव, ताण-तणाव आदी गोष्टींमुळे आरोग्यावर वाईट परिणाम होत आहे. महिला वेळोवेळी तपासण्या देखील करत नसल्याने गंभीर आजारांचा धोका उद्भवत असतो. गंभीर आजार टाळण्यासाठी वेळोवेळी आरोग्य तपासणी आवश्यक असल्याचे त्यांनी सांगितले.

यावेळी महिलांची मोफत आरोग्य तपासणी करुन लहान मुलांची दंत तपासणी करण्यात आली. यावेळी परिसरातील महिलांचा उत्स्फुर्त प्रतिसाद लाभला. कार्यक्रमासाठी सविता पालवे, अर्चना इथापे, निकिता पडवळे, जयश्री वाघ, मनीषा पटेल, नितू जाघोर, प्रियंका जगताप, उर्मिला मुळे, हेमा पुरी, रश्मी पुरी, पुनम रॉयल, ज्योती ढुमणे, अर्चना लेमकर, मनीषा कराळे, मयुरी शिंदे, संजीवनी माळवे, स्नेहल चव्हाण, स्नेहल सकट, रोहित अकोलकर आदी उपस्थित होते.

कार्यक्रमाचे सूत्रसंचालन प्रा. मंगल भोसले यांनी केले. आभार स्वाती डोमकावळे यांनी मानले. या उपक्रमास जिल्हा क्रीडा अधिकारी भाग्यश्री बिले, राज्य क्रीडा मार्गदर्शक विशाल गर्जे, जिल्हा युवा समन्वयक शिवाजी खरात, नेहरु युवा केंद्र कार्यक्रमाधिकारी सिद्धार्थ चव्हाण, जय असोसिएशन ऑफ एनजीओचे अध्यक्ष अ‍ॅड. महेश शिंदे यांचे मार्गदर्शन लाभले.