मजूर अड्ड्यावरील लंगर सेवेचा प्रारंभ
अहमदनगर (प्रतिनिधी)- शहरातील मजूर अड्ड्यावरील कामगारांना दर शनिवारी पौष्टिक व सकस आहार देण्याच्या लंगर सेवेच्या उपक्रमाचा प्रारंभ करण्यात आला. सेल्फ अवेकिंग मिशन, प्रहार करिअर अकॅडमी, मेरा धरती सुरज परिवार, एन.बी. धुमाळ फाउंडेशन, जय हिंद सेवा फाउंडेशन, बोरुडे ॲण्ड सन्स यांच्या संयुक्त विद्यमाने जुन्या महापालिके जवळ भरत असलेल्या मूजर अड्डा येथे हा उपक्रम सुरु राहणार आहे. पहिल्याच दिवसापासून कष्टकरी वर्गाचा या उपक्रमास उत्स्फूर्त प्रतिसाद लाभला.
यावेळी ज्येष्ठ उद्योजक एन.बी. धुमाळ, मेरा धरती सुरज परिवारचे संस्थापक अध्यक्ष संतोष पवार, महाऊर्जा ज्ञानपीठाचे संस्थापक अध्यक्ष संतोष पवार, प्रहार अकॅडमीचे संचालक विनोदसिंग परदेशी, जय हिंद सेवा फाउंडेशनचे अध्यक्ष शिवाजी पालवे, जितेंद्र परदेशी, गणेश पोटे, आकाश पवार, राजकुमार शिंदे, मालोजी शिकारे, बाळासाहेब भोसले, मेजर संदीप घुले, अर्जुन जायभाय, अक्षय शिंदे, राहुल राळेभात, सावंत आदी उपस्थित होते.
गुरुजी संजीव मलिक यांच्या संकल्पनेतून ही लंगर सेवा सुरु करण्यात आली आहे. शनिवारी सकाळी 9 ते 10 या वेळेत संपूर्ण कामगार वर्गाला पौष्टिक जेवण दिले जाणार आहे. या उपक्रमात पाचशे ते सहाशे कामगारांना एका दिवसाचे जेवण देण्याचे नियोजन करण्यात आले असून, याचा लाभ घेण्याचे आवाहन मजूरांना करण्यात आले आहे.
समाजातील खरे गरजू व कष्टकरी वर्गाला केले जाणारे अन्न दान समाधान देणारे असून, ही लंगर चळवळ कष्टकरी मजूरांसाठी चालवली जाणार असल्याचे धरती सुरज परिवार संस्थेचे संस्थापक अध्यक्ष संतोष पवार यांनी सांगितले. या उपक्रमाबद्दल उपस्थितांनी समाधान व्यक्त करुन या सेवेसाठी सहकार्य करण्याचे आश्‍वासन दिले.