आगाज कार्यक्रमातून फॅकल्टी स्टारने विद्यार्थ्यांशी साधला संवाद,
तणाव व्यवस्थापन व अभ्यासाच्या नियोजनावर केले मार्गदर्शन
नगर (प्रतिनिधी)- शहरातील गुलमोहर रोड, कलानगर चौकात नीट, जेईई परीक्षेच्या पूर्व तयारीसाठी सुरु झालेल्या फिजिक्सवाला विद्यापीठ पाठशाळेत शैक्षणिक वर्ष 2025-26 प्रवेश प्रक्रियेचे प्रारंभ आगाज या उपक्रमाद्वारे करण्यात आले. आगाज कार्यक्रमातंर्गत फिजिक्सवालाचे स्टार फॅकल्टी लक्ष्य कथुरिया, राहुल दुधी आणि रामनारायण सुतार यांनी विद्यार्थी आणि पालकांशी संवाद साधून नीट आणि जेईई मधील भविष्यातील संधी, विद्यार्थ्यांनी क्षेत्र निवडताना घ्यावयाची काळजी, तणाव व्यवस्थापन व अभ्यासाचे नियोजन या विविध विषयांवर मार्गदर्शन केले. या कार्यक्रमास विद्यार्थ्यांचा उत्स्फूर्त प्रतिसाद मिळाला.
सावेडी येथील कोहिनूर मंगल कार्यालयात आयोजित करण्यात आलेल्या आगाज या करियर मार्गदर्शन व्याख्यानाचे उद्घाटन सरस्वती पूजन व दीपप्रज्वलनाने करण्यात आले. यावेळी नगर मधील फिजिक्सवाला विद्यापीठ पाठशाळेचे संचालक मंडळ आदींसह मार्गदर्शक शिक्षक व विद्यार्थी मोठ्या संख्येने उपस्थित होते.
प्रास्ताविकात हरीश तावरे म्हणाले की, फिजिक्सवालाने एका वर्षात गुणवत्तेने विद्यार्थी व पालकांमध्ये एक विश्‍वास निर्माण केला आहे. 25 डिसेंबर पर्यंत प्रवेश घेणाऱ्या विद्यार्थ्यांना 30 टक्के डिस्काऊंट देण्यात आला आहे. या संधीचा विद्यार्थ्यांनी लाभ घ्यावा. सध्या सदर सेंटरमध्ये बाराशेपेक्षा अधिक विद्यार्थी शिक्षण घेत असल्याची माहिती दिली.
राहुल दुधी म्हणाले की, नीट, जेईई परीक्षेचा संकल्प केलेल्या विद्यार्थ्यांनी दहावी व अकरावीच्या शैक्षणिक वर्षाच्या पहिल्या दिवसापासून अभ्यास सुरु करुन त्यामध्ये सातत्य ठेवावे. यामध्ये खंड पडल्यास मागील बॅकलॉग भरुन काढताना मोठे परिश्रम घ्यावे लागते. घेतलेला संकल्प मधून सोडू नका, स्वतःवर विश्‍वास ठेवा. दर्जेदार शिक्षण सर्वांपर्यंत पोहोचविण्याचे कार्य फिजिक्सवाला करत आहे. पालकांचा दबाव व तणावमध्ये अभ्यास न करता, स्वयंफुर्तीने प्रेरणा घेऊन अभ्यासाला लागण्याचे आवाहन केले.
एक परीक्षा जीवनाचे भविष्य सांगू शकत नाही, मात्र हातात असलेली वेळ वाया घालवू नका. कुटुंबातील व्यक्तीच आपले खरे प्रेरणास्थान असतात. पालकांच्या कष्टापासून प्रेरणा घ्या. स्वतःमधील आत्मविश्‍वास महत्त्वाचा असतो. पालकांनी देखील मुलांना साथ द्यावी. परीक्षा अवघड आहे, मुलांचे मार्क पाहू नका त्यांचे परिश्रम व चिकाटीकडे लक्ष द्या. एक दिवस ते निश्‍चित यश प्राप्त करणार असल्याचे ड्युडी यांनी सांगितले. वेळेचे नियोजन करा, जेव्हाचे काम तेव्हा करा. वर्गात एकाग्र राहिल्यास अभ्यासासाठी वेगळा वेळ देण्याची गरज लागत नाही. या परीक्षांसाठी सराव महत्त्वाचा असून, अभ्यासाचे नियोजन करण्याचे त्यांनी सांगितले.
रामनारायण सुतार म्हणाले की, जीवनातील ध्येय निश्‍चित व क्लिअर असले पाहिजे. ध्येय समोर असल्यास वाटचाल प्रेरणादायी व यशस्वी ठरते, अन्यथा विद्यार्थी भरकटतात. मनापासून ध्येय निश्‍चित करा, यशात येणाऱ्या समस्यांची मनात भीती बाळगू नका. भीतीने माणूस तणावाचे दडपण येते. मानसिक व शारीरिक स्वास्थ्य चांगले ठेवण्याचे त्यांनी विद्यार्थ्यांना सांगितले.
लक्ष्य कथुरिया म्हणाले की, जीवनात शिस्त महत्त्वाची आहे. शिस्त असल्यास मोटिवेशनची प्रत्येक वेळेस गरज पडत नाही. आपल्या शालेय व महाविद्यालयीन जीवनातील आठवणी त्यांनी सांगितल्या. नीट आणि जेईई परीक्षेतील बारीक-सारीक गोष्टींचा उलगडा त्यांनी केला. आवड निवड नुसार क्षेत्र निवडा, योग्य वेळेत योग्य निर्णय घ्या, स्वतःची स्पर्धा स्वतःशी ठेवा, जीवनातील संघर्षमय गोष्टींतून त्यांनी यशाचा कानमंत्र विद्यार्थ्यांना दिला.
उपस्थित तिन्ही स्टार फॅकल्टी यांना विद्यार्थ्यांनी विविध प्रश्‍न विचारुन शंकाचे निरसन केले. तर पालकांना देखील मुलांचे क्षेत्र निवडताना, त्यांना प्रोत्साहन देण्यासंदर्भात यावेळी मार्गदर्शन करण्यात आले.