जिल्ह्यातील शेतकरी बांधव व शेतकरी संघटनांना सहभागी होण्याचे आवाहन
शेतमालाला चांगला भाव मिळून शेतकऱ्यांच्या आत्महत्या थांबविण्याचा प्रयोग
अहमदनगर (प्रतिनिधी)- शेतकऱ्यांच्या शेतमालाला चांगला भाव मिळून त्यांच्या आत्महत्या थांबविण्याच्या उद्देशाने पीपल्स हेल्पलाईन व भारतीय जनसंसदेच्या वतीने देशभरात केंद्र सरकारने वंदे किसान गुड्स ट्रेन्स सुरू करण्याची मागणी केली आहे. या मागणीसाठी सरकारचे लक्ष वेधण्यासाठी सोमवारी (दि.7 ऑक्टोबर) जिल्हाधिकारी कार्यालया समोर शेतकरी संघटनेचे ज्येष्ठ नेते अनिल घनवट, ॲड. कारभारी गवळी व अशोक सब्बन यांच्या पुढाकाराने आंदोलन होणार आहे. या आंदोलनात जिल्ह्यातील शेतकरी बांधवांनी व शेतकरी संघटनांनी सहभागी होण्याचे आवाहन करण्यात आले आहे.
संघटनेच्या माध्यमातून देशाचे पंतप्रधान नरेंद्र मोदी, रेल्वेमंत्री अश्‍विनी वैष्णव यांना ईमेलद्वारे सदर मागणीचे निवेदन पाठविण्यात आले आहे. देशभरात विशेषतः महाराष्ट्रात शेतकऱ्यांच्या आत्महत्या मोठ्या प्रमाणात होत आहे. याचे मुख्य कारण शेतीमालाला चांगली बाजारपेठ मिळत नाही आणि आधारभूत किमती देखील मिळत नाही. बऱ्याच वेळेला शेतीमालाचे भाव कोसळतात आणि त्यातून शेतकरी आर्थिक दृष्ट्या मोडीत निघतो. यावर देशभरातील बाजारपेठा सर्रास शेतकऱ्यांना उपलब्ध व्हाव्यात, या प्रमुख मागणीसाठी वंदे किसान गुड्स ट्रेन्स सुरू करण्याशिवाय पर्याय नाही, ही बाब संघटनेने यापुर्वीच सरकारला कळविली असल्याचे स्पष्ट करण्यात आले आहे.
शेतकऱ्यांबाबत सरकार उदासीन आहे. जगभरातील विकसित देशांनी किसान ट्रेन्स कृषी माल वाहतुकीसाठी फार पूर्वीच सुरू केल्या आहेत. परंतु भारतात शेतकऱ्यांच्या मालाला देशभरातील बाजारपेठ सहज उपलब्ध व्हावी, यासाठी काही एक प्रयत्न झाले नाही. त्यातून व्यापारी आणि मध्यस्थ शेतकऱ्यांची लूट सातत्याने करत आहेत. केंद्र आणि राज्य सरकारमधील सत्ताधारी शेतकऱ्यांना किरकोळ आर्थिक मदत देऊन मतांच्या माध्यमातून मागच्या दाराने सत्ताकाबीज करत असल्याचा आरोप संघटनेच्या वतीने करण्यात आला आहे.
वंदे किसान गुड्स ट्रेन्सच्या माध्यमातून भारतामध्ये मोठी कृषी मालवाहतूकीत क्रांती होणार आहे. त्यासाठी हे आंदोलन युद्ध पातळीवर जारी करण्यात आले असल्याचे संघटनेने जाहीर केले आहे.