युवकांचे उत्स्फूर्तपणे रक्तदान
संत अण्णा चर्च व उत्कर्ष बहुउद्देशीय संस्थेचा उपक्रम
अहमदनगर (प्रतिनिधी)- संत अण्णा चर्च व उत्कर्ष बहुउद्देशीय संस्थेच्या वतीने महिलांसह नागरिकांची मोफत आरोग्य तपासणी करण्यात आली. तर रक्तदान शिबिरात युवकांनी उत्स्फूर्तपणे रक्तदान केले. या शिबिरात नेत्र तपासणी, दंत तपासणी, स्त्री आरोग्य तपासणी, मधुमेह, उच्च रक्तदाब, हाडांची कॅल्शियम तपासणी करण्यात आली.
जुने जिल्हाधिकारी कार्यालया जवळील संत अण्णा चर्च मध्ये हे शिबिर पार पडले. या शिबिरासाठी रेव्ह. फादर ब्रिस्टन ब्रिटो, रेव्ह. फादर अजय डी मॉन्टी, उत्कर्ष बहुउद्देशीय संस्थेच्या अध्यक्षा नयना बनकर, सिमोन बनकर, फ्रँकलिन कुटिनो, रमेश भोसले, जेकब जाधव आदी उपस्थित होते.
रेव्ह. फादर ब्रिस्टन ब्रिटो म्हणाले की, तणावपूर्ण जीवनशैलीमुळे मनुष्याचे आरोग्याचे प्रश्‍न गंभीर बनले आहे. गरजूंना आरोग्य सेवा देणे ही ईश्‍वराचीच सेवा आहे. आरोग्य ही मनुष्याची खरी संपत्ती आहे. त्याची काळजी घेणे हे प्रत्येकाचे कर्तव्य असल्याचे त्यांनी सांगितले. रेव्ह. फादर अजय डी मॉन्टी यांनी रक्तादानाने एखाद्या गरजू रुग्णांचे प्राण वाचविण्याचे पुण्य रक्तदात्याला मिळत असते. एखाद्याचे जीव वाचवणे सर्वात मोठे मानवतेचे कार्य असल्याचे सांगून, त्यांनी युवकांना रक्तदान करण्याचे आवाहन केले.
नयना बनकर म्हणाल्या की, उत्कर्ष बहुउद्देशीय संस्थेच्या वतीने विविध सामाजिक उपक्रम घेवून समाजातील गरजू घटकांना आधार देण्याचे काम केले जात आहे. विविध शिबिराचा लाभ गरजू मिळत असून, गंभीर आजारांना सामोरे जाण्यापेक्षा वेळीच तपासणी करुन त्याचे निदान करणे आरोग्याच्या दृष्टीने अत्यावश्‍यक असल्याचे त्यांनी सांगितले.
या शिबिरात डॉ. हिमांशू मर्लेचा यांनी नेत्र तपासणी, डॉ. स्वाती चंगेडिया यांनी दंत तपासणी तर डॉ. प्रियंका शर्मा, डॉ. सोमेश्‍वर गायकवाड, डॉ. मीना फुके यांनी स्त्री आरोग्याची तपासणी करुन मार्गदर्शन केले. तसेच यावेळी इतर आरोग्य तपासण्या देखील मोफत करण्यात आल्या. नोटरी पब्लिकपदी नियुक्ती झाल्याबद्दल ॲड. महेश शिंदे यांचा सत्कार करण्यात आला. रक्तदान शिबिरात 40 रक्त पिशव्या संकलित करण्यात आल्या.
शिबिर यशस्वी करण्यासाठी शाल्विना नेल्सन, शैला कुटीनो, मिना जाधव, वैशाली पगारे, सुरेखा भोसले, सुलभा पडगळमल, उषा म्हंकाळे आदींनी परिश्रम घेतले. कार्यक्रमाचे सूत्रसंचालन शाल्वीना नेल्सन यांनी केले. आभार साक्षी बनकर यांनी मानले.