सुपा एमआयडीसी, म्हसणे फाटा परिसरातील अवैध गौण खनिज उत्खननावर कारवाईची मागणी
कारवाईसाठी पथक येण्यापूर्वीच फोन फिरवले जात असल्याचा आरोप
अहमदनगर (प्रतिनिधी)- वारंवार तक्रार व पाठपुरावा करुन देखील सुपा एमआयडीसी येथील म्हसणे फाटा परिसरात सुरु असलेला अवैध गौण खनिज उत्खनन करणाऱ्यांवर कारवाई होत नसल्याने भ्रष्टाचार विरोधी जनआक्रोशच्या वतीने राज्याचे महसूलमंत्री तथा पालकमंत्री राधाकृष्ण विखे पाटील यांच्या शहरातील जुने जिल्हाधिकारी कार्यालय येथील संपर्क कार्यालया समोर उपोषण करण्यात आले. एका लोकप्रतिनिधीच्या दबावामुळे महसूलचे अधिकारी व कर्मचारी यांच्या संगनमताने अवैध गौण खनिजचे उत्खनन सुरु असून, कारवाई करण्यासाठी पथक येण्यापूर्वीच त्यांना महसूलचे काही अधिकारी, कर्मचारी फोन करुन त्यांना सावध करत असल्याचा आरोप करण्यात आला आहे.
या उपोषणात संघटनेचे जिल्हाध्यक्ष योगेश कुलथे, प्रदेश उपाध्यक्ष रघुनाथ आंबेडकर, पश्‍चिम महाराष्ट्र अध्यक्ष काशीनाथ पाचंगे, कार्याध्यक्ष संजय पाचुंदकर, प्रियंका जगताप, प्रेरणा धेंडे, अनिल पठारे, दिपक साळवे, संदीप चव्हाण, रविश रासकर, राजू वाखारे, शशिकांत वालेकर, गणेश शिंदे, बाबासाहेब महापुरे आदींसह संघटनेचे कार्यकर्ते, पदाधिकारी व सामाजिक कार्यकर्ते सहभागी झाले होते.
सुपा एमआयडीसी येथील म्हसणे फाटा येथे रात्रीच्या वेळेस बेसुमार अवैध गौण खनिज उत्खनन सुरु आहे. याबाबत तक्रार करून देखील कारवाई करण्यात आलेली नाही. एका लोकप्रतिनिधीचे निकटवर्तीय सदर काम करत आहे. यामधील लोकप्रतिनिधीच्या घरातील ठेकेदार असलेल्यांचा खानपट्टा असून, खानपट्ट्याची रॉयल्टी दाखवून रात्रीच्या वेळेस एमआयडीसी हद्दीत मुरमची चोरी सुरु आहे.
यासंदर्भात पारनेर तहसीलदार व कर्मचारी यांना दूरध्वनी करून कळवले असता पुन्हा संपर्क केल्याचे त्या अधिकाऱ्यांचे मोबाईल बंद येतात. दिवसा जावून चौकशी केल्यास उडवाउडवीची उत्तरे दिली जातात. अधिकारी व कर्मचारी यांच्या संगनमताने अवैध गौण खनिजचे उत्खनन सुरु असून, कारवाई होण्या अगोदरच त्यांना फोन करुन कळविण्यात येते. आजपर्यंत कोणत्याही अधिकाऱ्याला मुरूम व माती तस्कर सापडलेला नाही. अवैध चोरीचे माती व मुरूम घेणाऱ्या कंपन्यांची चौकशी करण्याचे संघटनेच्या वतीने स्पष्ट करण्यात आले आहे.
म्हसणे फाटा परिसरात अवैध गौण खनिज उत्खननाची तक्रार करुन देखील कारवाई होत नसल्याने ठेकेदारांशी संगनमत करणारे तलाठी, सर्कल व इतर अधिकाऱ्यांची चौकशी करुन त्यांना निलंबीत करण्यात यावे, गौण खनिज रॉयल्टी रक्कम भरणाऱ्या कंपन्यांचे पंचनामे करून दंडात्मक कारवाई करावी, समिती गठित करून अर्जात दिलेल्या कंपन्यांचे पंचनामे करण्यात यावे, यामध्ये दोषी असलेले तहसीलदार व नायब तहसीलदार यांचे निलंबन करावे, केलेल्या तक्रार अर्जाचा चौकशी अहवाल प्राप्त व्हावा, तक्रारी नुसार किती दोषी ठेकेदारांवर पारनेर तहसील कार्यालयाकडून कारवाई झाली त्याचा अहवाल द्यावा व कंपनीचे पंचनामे इन कॅमेरा करण्याची मागणी संघटनेच्या वतीने करण्यात आली आहे.
पारनेर तहसीलदार यांना भ्रष्टाचार विरोधी जनआक्रोशचे संस्थापक अध्यक्ष भाऊसाहेब कांबळे यांनी पत्र पाठवून सदर प्रकरणी दखल घेऊन तात्काळ कारवाई करण्याची मागणी केली आहे. उपोषणकर्त्यांना कारवाईचे ठोस आश्‍वासन देऊन त्यांना उपोषणापासून परावृत्त करावे. अन्यथा संघटनेच्या वतीने तीव्र आंदोलन करण्याचा इशारा त्यांनी दिला आहे.