महाराष्ट्र लोकसेवा आयोग व राज्य सरकारच्या नियंत्रणाखालील विविध यंत्रणांमार्फतच भरती प्रक्रिया राबवावी
अन्यथा सुशिक्षित बेरोजगार युवकांसह राज्यव्यापी आंदोलन छेडण्याचा इशारा
अहमदनगर (प्रतिनिधी)- बेरोजगारीने युवकांच्या आत्महत्या वाढत असताना रोजगार निर्माण करण्याऐवजी राज्य सरकारी सेवेतील 138 संवर्गातील रिक्त पदे कंत्राटी पद्धतीने भरण्याचा निर्गमीत झालेला शासन निर्णय तात्काळ रद्द करावा व महाराष्ट्र लोकसेवा आयोग व राज्य सरकारच्या नियंत्रणाखालील विविध यंत्रणांमार्फतच भरती प्रक्रिया राबविण्याची मागणी भारतीय कम्युनिस्ट पक्षाच्या वतीने राज्य सरकारकडे केली असल्याची माहिती भाकपचे राज्य सेक्रेटरी कॉ. सुभाष लांडे यांनी दिली.
राज्य सरकारच्या विविध संवर्गातील सुमारे अडीच लाखांपेक्षा जास्त पदे रिक्त असून, ती भरली जात नाहीत. या पूर्वी खाजगी एजन्सीमार्फत भरती प्रक्रिया करण्याचे प्रयत्न करण्यात आले आहेत. त्यात अनेक त्रुटी, दोष, अनियमितता आढळून आल्याने भरती प्रक्रिया रखडली आहे. विविध प्रकारच्या शैक्षणिक पात्रता प्राप्त बेरोजगार तरुणांना राज्य सरकारकडे पदे रिक्त असतानाही नोकऱ्यांपासून वंचित ठेवले जात आहे. त्यामुळे त्यांच्यामध्ये निराशेचे वातावरण निर्माण झाले आहे. अशा तरूणांचा समाजविघातक शक्ती गैरफायदा घेत आहेत, तरुणांमध्ये आत्महत्येचे प्रमाण वाढत असल्याचे स्पष्ट करण्यात आले आहे.
भारतीय कम्युनिस्ट पक्ष अशी मागणी करीत आहे की, राज्य सरकारने खाजगी एजन्सीमार्फत कंत्राटी पद्धतीने भरती प्रक्रिया करण्यासाठी निर्गमीत केलेला शासन निर्णय तात्काळ रद्द करून शासकीय यंत्रणा मार्फत कायमस्वरूपी नोकरभरती प्रक्रिया सुरू करण्यात यावी व राज्य सरकारच्या सेवेतील सर्व रिक्त पदे ताबडतोब भरण्यात यावी अन्यथा भाकपच्या पुढाकाराने विविध शैक्षणिक पदवी प्राप्त विद्यार्थी युवक राज्यव्यापी आंदोलन छेडणार असल्याचा इशारा देण्यात आला आहे.