आमदार जगताप यांना मंत्री पद मिळण्यासाठी लक्ष्मीआईला साकडे
भंडाऱ्याची उधळण करीत भाविकांनी केला लक्ष्मीमातेचा जयघोष
अहमदनगर (प्रतिनिधी)- आषाढ अमावस्यानिमित्त शहरातील रामवाडी येथे लक्ष्मीआई यात्रा उत्सव मोठ्या उत्साहात साजरा करण्यात आला. रामवाडी परिसरातून पारंपारिक वाद्यांच्या गजरात मिरवणुक काढण्यात आली होती. घोड्यांच्या बग्गीत असलेल्या लक्ष्मीमातेच्या मुर्तीने सर्वांचे लक्ष वेधले.
भंडाऱ्याची उधळण व लक्ष्मीमातेचा जयघोष करीत भाविक मोठ्या संख्येने मिरवणुकीत सहभागी झाले होते. विकासात्मक कामाने शहराचा कायापालट करणारे आमदार संग्राम जगताप यांना भविष्यात मंत्री पद मिळण्यासाठी लक्ष्मीआईला साकडे घालण्यात आले.
आमदार संग्राम जगताप यांच्या मार्गदर्शनाखाली मिरवणुकीचे प्रारंभ करण्यात आला. वर्चस्व ग्रुपचे सागर मुर्तंडकर व इंगळे प्रतिष्ठानचे विकी इंगळे यांच्या हस्ते मिरवणुकीच्या प्रारंभी नारळ फोडण्यात आला. दरवर्षी लक्ष्मीआई यात्रा मोठ्या उत्साहात साजरी केली जाते. युवकांनी प्रवरा संगम येथून कावडीने आणलेल्या जलने रामवाडी येथील लक्ष्मी मातेच्या मुर्तीला अभिषेक घालण्यात आला.
विधीवत पूजा करुन लक्ष्मीमातेच्या उत्सवमुर्तीची मिरवणुक शहरातून काढण्यात आली. भाविकांसह युवकांनी भक्तीगीतांवर ठेका धरला होता. पारंपारिक वाद्यांनी संपूर्ण परिसर दणाणून निघाला. ही शोभायात्रा कोठला, मंगलगेट, सर्जेपूरा, रंगभवन येथून मार्गक्रमण होऊन रामवाडी येथे तिचा समारोप झाला.
तसेच यात्रेच्या आदल्यादिवशी रामवाडीत यात्रेनिमित्त भंडाऱ्याचे आयोजन करण्यात आले होते. भंडारा वाटपाचे प्रारंभ मावळा प्रतिष्ठानचे अध्यक्ष निलेश म्हसे पाटील, राष्ट्रवादी सामाजिक न्याय विभागाचे सुरेश बनसोडे, माजी नगरसेवक सचिन जाधव, माजी नगरसेवक भाऊसाहेब उनवणे यांच्या उपस्थितीत झाले. मोठ्या संख्येने उपस्थित असलेल्या नागरिकांनी भंडाऱ्याचा लाभ घेतला. हा लक्ष्मीआई यात्रा उत्सव यशस्वी करण्यासाठी प्रकाश वाघमारे, सागर साठे, सतीश साळवे, दीपक साबळे, सुरेश वैरागर, अश्विन खुडे, पप्पू पाटील, दीपक सरोदे, किशोर उल्हारे, दीपक लोखंडे यांनी परिश्रम घेतले.