आम आदमी पार्टी व सामाजिक संस्थांचा उपक्रम
स्वच्छता अभियान कृतीशीलपणे राबविणे हेच महात्मा गांधींना खरे अभिवादन ठरणार -ॲड. महेश शिंदे
अहमदनगर (प्रतिनिधी)- स्वच्छता अभियान कृतीशीलपणे राबविणे व स्वच्छ भारतासाठी प्रत्येकाने योगदान देणे, हेच खरे महात्मा गांधींना अभिवादन ठरणार असल्याचे प्रतिपादन जय असोसिएशन ऑफ एनजीओचे अध्यक्ष ॲड. महेश शिंदे यांनी केले.
आम आदमी पार्टी, जय असोसिएशन ऑफ एनजीओ (महाराष्ट्र राज्य), उडान फाउंडेशन, समर्पण बहुउद्देशीय संस्था, समृद्धी महिला संस्था, जय युवा अकॅडमी, माहेर फाउंडेशन, उमंग फाउंडेशन, उत्कर्ष बहुउद्देशीय संस्था, रसिक रंजन, उमेद सोशल फाउंडेशन, अजय फाउंडेशन, रयत प्रतिष्ठान आदी स्वयंसेवी संस्थांच्या संयुक्त विद्यमाने तारकपूर बस स्थानक परिसरात असलेले खड्डे जेसीबीच्या साह्याने बुजवून या भागात काटेरी गवत, झुडपे हटवून श्रमदान करण्यात आले. तर परिसरात स्वच्छता अभियानाद्वारे स्वच्छता करण्यात आली. यावेळी ॲड. शिंदे बोलत होते.
या उपक्रमात आम आदमी पार्टीचे शहराध्यक्ष भरत खाकाळ, जिल्हा सचिव प्रा. अशोक डोंगरे, दिलीप घुले, रवी सातपुते, नितीन लोखंडे, प्रकाश वडवणीकर, तुकाराम भिंगारदिवे, ॲड. विद्या शिंदे, काकासाहेब खेसे, गणेश मारवाडे, संपत मोरे, सामाजिक कार्यकर्ते विजय भालसिंग, ॲड. सुनील तोडकर, आरती शिंदे, रजनी ताठे, प्रकाश डोमकावळे, नयना बनकर, सिमोन बनकर, अनिल साळवे, अनिल साळवे, डॉ. संतोष गिऱ्हे, धीरज ससाणे, संजय निर्मळ, सचिन साळवी, प्रदीप बागुल, विजय लोंढे, रवी सुरेकर, कांचन लद्दे, विद्या तन्वर आदी सहभागी झाले होते.
दिलीप घुले यांनी शहरातील सर्व प्रभागात लोकसहभागातून दररोज सकाळी दोन तास स्वच्छता मोहीम राबवली जाणार असून, नगरकरांनी सहभाग नोंदविण्याचे आवाहन त्यांनी केले. शहराध्यक्ष भरत खाकाळ यांनी शहराला कचरामुक्त करण्यासाठी सामाजिक संस्थांना सोबत घेऊन आम आदमी पार्टी कार्य करणार आहे. यामुळे रोगराईमुक्त होणार असल्याचे त्यांनी स्पष्ट केले.
प्रा. अशोक डोंगरे यांनी निरोगी आरोग्यासाठी सार्वजनिक स्वच्छता महत्त्वाची आहे. आपला परिसर स्वच्छ ठेवणे ही प्रत्येकाची जबाबदारी असून, स्वच्छतेसाठी स्वतःपासून सुरुवात करुन सामाजिक आरोग्य जपण्याचे त्यांनी आवाहन केले. कार्यक्रमाचे संयोजन रवी सातपुते यांनी केले होते. आभार ॲड. विद्या शिंदे यांनी मानले. या स्वच्छता अभियानात बस स्थानक प्रमुख, कर्मचारी, रिक्षा चालक आदींचे सहकार्य लाभले.