संपूर्ण कामाची चौकशी व्हडिओ चित्रीकरणाद्वारे करुन, त्या अधिकाऱ्याला बडतर्फ करण्याची मागणी
प्रधान मुख्य वनरक्षक कार्यालयासमोर उपोषण करण्याचा इशारा
वाजिद शेख अहमदनगर (प्रतिनिधी)- पारनेर व पाथर्डी तालुक्यातील सामाजिक वनीकरणच्या वृक्ष लागवड कामात झालेल्या अपहाराची प्रत्यक्षात चौकशी न करता त्या अधिकारी, कर्मचाऱ्यांना पाठीशी घालण्यासाठी जाणीवपूर्वक विभागीय वन अधिकारी यांनी अर्थपूर्ण संबंध ठेवल्याचा आरोप करत त्यांना प्रमोशन न देता त्यांना कायमस्वरूपी बडतर्फ करावे व संपूर्ण कामाची चौकशी व्हडिओ चित्रीकरणाद्वारे करण्याची मागणी अन्याय निवारण निर्मूलन सेवा समितीच्या वतीने करण्यात आली आहे.
21 दिवसाच्या आत कारवाई न झाल्यास समितीच्या वतीने प्रधान मुख्य वनरक्षक सामाजिक वनीकरण (पुणे) यांच्या कार्यालयासमोर बेमुदत उपोषण करण्याचा इशारा जिल्हाध्यक्ष अरुण रोडे व पारनेर तालुकाध्यक्ष निवृत्ती कासुटे यांनी दिला आहे.
पारनेर व पाथर्डी तालुक्यातील वृक्ष लागवडचा अपहार उघडकीस येवू नये, या भितीने सदरची माहिती दडवून ठेवण्यात येत आहे. वृक्ष लागवड बाबत झालेल्या खर्चाबाबत अंदाजपत्रकीय रक्कम, निर्माण मनुष्य दिवस, खड्डे खोदकाम, वाहतूक खर्च, लागवड खर्च, वृक्ष संरक्षण व देखरेखसाठी झालेल्या खर्चाबाबत अनेक वेळा तक्रार करुन देखील सामाजिक वनीकरणचे विभागीय वन अधिकारी यांनी वनक्षेत्रपाल यांच्याशी संगणमत करून प्रत्यक्षात कुठलेही दप्तर न तपासता, कुठल्याही कामाची पाहणी न करता दिशाभूल करणारा अहवाल दिला असल्याचे संघटनेच्या वतीने स्पष्ट करण्यात आले आहे.
वाडेगव्हाण, आळकुटी, जवला कॅनॉल येथे वृक्ष लागवड झाली असून, खर्चाची दप्तर तपासणी व जिवंत झाडांचे व्हिडिओ चित्रीकरण करण्यात यावे, ज्या टँकरने पाणी घातले त्या टँकर मालकाची माहिती व बिलाच्या प्रती, शेरे पुस्तिका, योजना निहाय सन 2018 ते आजअखेर दप्तर निहाय, वृक्ष लागवडीचे संपूर्ण कामाचे गाव निहाय व्हिडिओ चित्रीकरणात चौकशी करण्यात यावी, भ्रष्टाचारास पाठीशी घालणारे विभागीय वन अधिकारी यांना कायमस्वरूपी बडतर्फ करण्यात यावे, पारनेर व पाथर्डी तालुक्यात संपूर्ण कामाची चौकशी होवून पारनेर, पाथर्डी वनक्षेत्रपाल यांना तात्काळ बडतर्फ करण्याची मागणी अन्याय निवारण निर्मूलन सेवा समितीच्या वतीने करण्यात आली आहे. तर याची दखल न घेतल्यास उच्च न्यायालयात याचिका दाखल करण्याचा इशारा रोडे व कासुटे यांनी दिला आहे.