अन्यथा आशांना अँड्रॉइड मोबाईल, इंटरनेट व कामाचा मोबदला द्यावा
अहमदनगर (प्रतिनिधी)- बळजबरीने आशांकडून करुन घेतले जाणारे ऑनलाईनच्या कामावर बहिष्काराची हाक देत बुधवारी (दि.13 सप्टेंबर) जिल्हा परिषदेवर मोर्चा काढून महाराष्ट्र राज्य आरोग्य खाते आशा व गट प्रवर्तक संघटना आणि अहमदनगर जिल्हा आशा संघटनेच्या वतीने धरणे आंदोलन करण्यात आले. या आंदोलनात जिल्ह्यातील आशा सेविका मोठ्या संख्येने सहभागी झाल्या होत्या.
आशा सेविकांवर लादण्यात आलेली ऑनलाईनची कामे करणार नसल्याच्या घोषणा आशांनी यावेळी दिल्या. ऑनलाईनची कामे करण्यास भाग पाडणाऱ्या प्रशासनाने आशांना अँड्रॉइड मोबाईल, इंटरनेटचा मासिक 300 रुपय खर्च व प्रत्येकी आयुष्यमान कार्डच्या मागे 50 रुपये रुपये द्यावे त्यानंतरच त्यांच्यावर कामाची जबाबदारी सोपविण्याची मागणी करण्यात आली. बुरुडगाव रोड येथील भाकपच्या पक्ष कार्यालया पासून मोर्चाला प्रारंभ झाले होते. मोर्चा जिल्हा परिषदेत धडकल्यावर जोरदार निदर्शने करण्यात आली. या आंदोलनात संघटनेचे राज्य उपाध्यक्ष कॉ. ॲड. सुधीर टोकेकर, जिल्हा संघटक कॉ. सुरेश पानसरे, कॉ. जयश्री गुरव, कविता गिरे, वर्षा चव्हाण, सुनिता धामणे, सविता धापटकर, लंका पठाडे, सुप्रिया जाधव, सोनाली शेजुळ, उषा अडागळे, निर्मला खोडदे, सुषमा इंगळे, मंगल दुरे, रुपाली माळवदे, आशा खेडकर, निर्मला कहांडळ, स्मिता ठोंबरे, नंदा पळसकर, स्वाती नलगे, जनाबाई हारदे, अर्चना आगरकर, योगीता गुजर, स्वाती भगणे, विद्या मुंडे, अंजली शेळके, मनिषा लंके, अश्‍विनी गोसावी, लता आघाव, उषा दिघे, योगीता देवढे, संगीता सावंत, मनिषा वाघ आदी आशा सेविका मोठ्या संख्येने सहभागी झाल्या होत्या.
आशा कर्मचारी यांची फिल्ड वर्कर म्हणून नेमणूक केलेली असतानाही त्यांना ऑनलाईनची कामे सांगितली जात आहे. महाराष्ट्रभर आशा वर्कर कडून ऑनलाईनची कामे विनामोबदला करून घेतले जात आहे. वास्तविक आशा वर्करचे काम फिल्ड वर्क असतानाही कोरोना काळापासून अनेक कामांचा बोजा राज्य सरकारने त्यांच्यावर टाकून कमी पैशात अनेक योजना राबवून घेतल्या आहेत. प्रधानमंत्री जन आरोग्य योजना अंतर्गत लाभार्थ्यांना आयुष्यमान कार्ड दिले जात आहे. यासाठी आशा सेविकांनी संबंधित व्यक्तीची माहिती घेणे, केवायसी करुन ऑनलाईन कामे करावी लागत आहे.
आशा वर्कर यांना मोबाईल भत्ता केवल शंभर रुपये आहे. आशांना कोणत्याही प्रकारे इंटरनेट सुविधांचा खर्च दिला जात नाही. 10 ते 20 टक्के आशा महिलांकडे अँड्रॉइड फोन नाही. वास्तविक आशाची नेमणूक करताना शिक्षणाची फारशी अट नव्हती, स्वयंसेवीका म्हणूनच त्यांचे आरोग्य संदर्भात काम होते. ऑफलाईनची माहिती नंतर वाढू लागली आणि आता कसलेही तांत्रिक शिक्षणा नसताना त्यांच्याकडून ऑनलाइनची कामे करण्याचा सापटा लावण्यात आलेला असल्याचे संघटनेच्या वतीने स्पष्ट करण्यात आले आहे.
आशा वर्कर 5 हजार रुपयांच्या मानधनावर दिवसभर काम करत असतात. त्यांच्याकडे फील्ड वर्करचे काम असताना, त्यांना मोबाईल मध्ये ऑनलाईनच्या कामात अडकविण्यात आल्याने बाकीच्या कामावर ताण पडत आहे. ऑनलाइन कामासाठी दुसरी यंत्रणा उभी करून हे काम करून घेणे अपेक्षित आहे. आशा वर्कर यांना जे काम जमत नाही, तरी त्यांच्यावर दबाव टाकण्यात येत आहे. वेगवेगळे मेडिकल ऑफिसर आणि संबंधित आरोग्य कर्मचारी आशा वर्कर यांच्यावर दबाव वाढवत आहे. आशांना कोणत्याही प्रकारे ऑनलाईनचा मोबदला दिलेला नाही. याचा मोबदला मिळणार का नाही याची देखील शाश्‍वती नसल्याने आशा सेविकांनी ऑनलाईन कामावर बहिष्काराचा निर्णय घेतलेला आहे. आशांच्या मागणीचे निवेदन सहाय्यक जिल्हा आरोग्य अधिकारी (जिल्हा परिषद) डॉ. दहिफळे यांना देवून ऑनलाईनची कामे न करता ऑफलाईन कामासाठी सहकार्याची भूमिका आशा सेविकांनी दर्शवली.